Дональд Трампнинг маъмурияти Пхеньянда элчихона очиш имкониятларини кўриб чиқмоқда. Шу билан бирга, КХДРга ядро дастуридан воз кечиши учун товон сифатида инсонпарварлик ёрдами етказиб бериш имконияти ҳам ўрганиб чиқилмоқда. Бу ҳақда Жанубий Корея газеталарига таяниб, «ТАСС» хабар берди.
Хабар берилишича, бу масалалар Вашингтон ва Пхеньян вакиллари томонидан икки томонлама маслаҳатлашувларда муҳокама қилинган. КХДР ва АҚШ етакчиларининг саммити муваффақиятли ўтган тақдирда, бу ишлар қисқа муддат ичида амалга оширилиши мумкин.
Жанубий Корея делегацияси 5 март куни КХДР етакчиси билан Пхеньянда учрашди. Музокаралар чоғида икки мамлакат етакчиларининг учрашувини ўтказишга келишиб олинган. Ўшанда шимол худди шундай учрашувни АҚШ президенти билан ҳам ўтказишга тайёр эканлигини билдирган. Учрашув жорий йилнинг май ёки июнь ойида бўлиб ўтиши мумкин.
Мартдаги учрашувдан кейин бошланган олий даражадаги мулоқот давомида Корея саммитининг санаси 27 апрелга белгиланган. Айни вақтда унга тайёргарлик доирасида муҳокамаларнинг бир неча раунди бўлиб ўтди. Томонлар протокол масалалари, хавфсизлик чоралари ва саммитни журналистлар томонидан ёритиш масалаларини муҳокама қилган.
Изоҳ (0)