“O‘zbekyengilsanoat” assotsiatsiyasida N&H Japan Inc. rahbari bilan uchrashuv bo‘lib o‘tdi

Toshkentda Yaponiyaning N&H Japan Inc. kompaniyasi direktori va asoschisi Sitomu Nakagava “O‘zbekyengilsanoat” assotsiatsiyasi rahbariyati bilan uchrashdi. Bu haqda UzDaily xabar berdi.

Tashrifdan ko‘zlangan maqsad O‘zbekistonning yengil sanoat va to‘qimachilik-trikotaj mahsulotlarini Yaponiya va Janubi-sharqiy Osiyo mamlakatlari bozorlariga chiqarish bo‘yicha konsalting xizmatlarini ko‘rsatish hisoblanadi.

Shuningdek, yengil sanoat sohasi uchun imtiyozli kredit liniyalarini ajratish yo‘li bilan yapon investitsiyalarini jalb qilish, qurilmalar lizingi imkoniyatlari kabi masalalarni muhokama qilish ham tashrifdan ko‘zlangan maqsadlar qatoriga kiradi.

N&H Japan Inc. bosh direktori rahbarligidagi yapon delegatsiyasi tashrifi Investitsiyalar bo‘yicha davlat qo‘mitasining tashabbusi bilan tashkil qilingan.

Muzokaralar chog‘ida tomonlar ikki tomonlama savdo-iqtisodiy hamkorlikning bugungi holati va istiqbollarini muhokama qildi. Yapon kompaniyalarining yengil sanoat sohasi rivojidagi roli qayd etildi. Soha korxonlarida Toyota, Murata, Tsudakoma, Tajima, Juki, Brothers kabi kompaniyalarning texnologiyalari o‘rnatilgani, shuningdek, Itochu Corporation va Marubeni Corporation kompaniyalarining savdo vakolatxonalari faol ish olib borayotgani ta’kidlab o‘tildi.

Tomonlar mahalliy tayyor mahsulotlarni Uniqlo savdo tarmog‘i orqali sotish yuzasidan N&H Japan Inc. bilan hamkorlik yo‘llarini ko‘rib chiqdi.