Тошкентда Япониянинг N&H Japan Inc. компанияси директори ва асосчиси Ситому Накагава «Ўзбекенгилсаноат» ассоциацияси раҳбарияти билан учрашди. Бу ҳақда UzDaily хабар берди.
Ташрифдан кўзланган мақсад Ўзбекистоннинг енгил саноат ва тўқимачилик-трикотаж маҳсулотларини Япония ва Жануби-шарқий Осиё мамлакатлари бозорларига чиқариш бўйича консалтинг хизматларини кўрсатиш ҳисобланади.
Шунингдек, енгил саноат соҳаси учун имтиёзли кредит линияларини ажратиш йўли билан япон инвестицияларини жалб қилиш, қурилмалар лизинги имкониятлари каби масалаларни муҳокама қилиш ҳам ташрифдан кўзланган мақсадлар қаторига киради.
N&H Japan Inc. бош директори раҳбарлигидаги япон делегацияси ташрифи Инвестициялар бўйича давлат қўмитасининг ташаббуси билан ташкил қилинган.
Музокаралар чоғида томонлар икки томонлама савдо-иқтисодий ҳамкорликнинг бугунги ҳолати ва истиқболларини муҳокама қилди. Япон компанияларининг енгил саноат соҳаси ривожидаги роли қайд этилди. Соҳа корхонларида Toyota, Murata, Tsudakoma, Tajima, Juki, Brothers каби компанияларнинг технологиялари ўрнатилгани, шунингдек, Itochu Corporation ва Marubeni Corporation компанияларининг савдо ваколатхоналари фаол иш олиб бораётгани таъкидлаб ўтилди.
Томонлар маҳаллий тайёр маҳсулотларни Uniqlo савдо тармоғи орқали сотиш юзасидан N&H Japan Inc. билан ҳамкорлик йўлларини кўриб чиқди.
Изоҳ (0)