Xo‘ja Ilg‘or qishlog‘ida Xalqaro press-klubning sayyor sessiyasi bo‘lib o‘tmoqda

9-aprel kuni buyuk Sohibqiron, davlat arbobi Amir Temur tavallud topgan Xo‘ja Ilg‘or qishlog‘ida Qashqadaryo viloyati hokimligi, Madaniyat vazirligi, Turizmni rivojlantirish davlat qo‘mitasi, O‘zbekiston yoshlar ittifoqi, Milliy teleradiokompaniya, Milliy axborot agentligi hamkorligida Xalqaro press-klubning “Xo‘ja ilg‘or qayta kashf qilingan tarix – yangi sayyohlik yo‘nalishi” mavzusida sayyor sessiyasi tashkil etildi, deb xabar beradi O‘zA.

Prezident Shavkat Mirziyoyev tashabbusi bilan Amir Temur shaxsiga hurmat, Sohibqiron bobomiz va temuriylar davrini qaytadan kashf qilish, Amir Temur davrining nafaqat O‘zbekiston, balki dunyo xalqlari davlatchiligida tutgan o‘rnining o‘ziga xos xususiyatlarini ochib berish, bu jihatlarning yoshlarimiz hayotidagi tarbiyaviy ahamiyatini oshirishga alohida e’tibor qaratib kelinmoqda. Biz davlat rahbarining bu g‘oyat muhim ahamiyatli tashabbusi va sa’y-harakatlaridan ilhomlangan holda, Xo‘ja Ilg‘or qishlog‘ida sayyor press-klub sessiyasi o‘tkazmoqdamiz. Maqsadimiz siyosiy tahlikali, xalq mo‘g‘ullar istilosidan zulm chekayotgan bir davrda dunyoga kelgan va ozodlik uchun kurashib, buyuk davlatga asos solgan bobomiz siymosini qayta kashf qilish, Xo‘ja Ilg‘orda yangi sayyohlik manzilini yaratish.

Sherzodxon Qudratxo‘jayev, Xalqaro press-klub raisi.  

Tarixiy tadbirda Amir Temur hazratlarining dunyoga kelgunicha, tug‘ilish, bolalik va balog‘at yoshidagi hayotidan, vatanini bosqinchilar zulmidan ozod etish, davlatchilik asoslari, mamlakat boshqaruvidagi eng muhim falsafiy jihatlar teatrlashtirilgan sahnalar orqali ochib beriladi. Amir Temur tug‘ilib, voyaga yetgan qishloqqa ilk bor kelib turgan xorijlik sayyohlar, qashqadaryolik olimlar fikri jamoatchilikka yetkaziladi.

Tadbir doirasida taniqli san’atkorlar ishtirokida konsert dasturi namoyish etiladi.