9 апрель куни буюк Соҳибқирон, давлат арбоби Амир Темур таваллуд топган Хўжа Илғор қишлоғида Қашқадарё вилояти ҳокимлиги, Маданият вазирлиги, Туризмни ривожлантириш давлат қўмитаси, Ўзбекистон ёшлар иттифоқи, Миллий телерадиокомпания, Миллий ахборот агентлиги ҳамкорлигида Халқаро пресс-клубнинг «Хўжа илғор қайта кашф қилинган тарих – янги сайёҳлик йўналиши» мавзусида сайёр сессияси ташкил этилди, деб хабар беради ЎзА.
Президент Шавкат Мирзиёев ташаббуси билан Амир Темур шахсига ҳурмат, Соҳибқирон бобомиз ва темурийлар даврини қайтадан кашф қилиш, Амир Темур даврининг нафақат Ўзбекистон, балки дунё халқлари давлатчилигида тутган ўрнининг ўзига хос хусусиятларини очиб бериш, бу жиҳатларнинг ёшларимиз ҳаётидаги тарбиявий аҳамиятини оширишга алоҳида эътибор қаратиб келинмоқда. Биз давлат раҳбарининг бу ғоят муҳим аҳамиятли ташаббуси ва саъй-ҳаракатларидан илҳомланган ҳолда, Хўжа Илғор қишлоғида сайёр пресс-клуб сессияси ўтказмоқдамиз. Мақсадимиз сиёсий таҳликали, халқ мўғуллар истилосидан зулм чекаётган бир даврда дунёга келган ва озодлик учун курашиб, буюк давлатга асос солган бобомиз сиймосини қайта кашф қилиш, Хўжа Илғорда янги сайёҳлик манзилини яратиш.Тадбир «O‘zbekiston-24» телеканали орқали намойиш этиб борилади. Дастлабки жонли эфир соат 10:15 да бўлиши режалаштирилган. Кун давомида Хўжа Илғор тантаналари бир неча бор жонли эфирда томошабинлар эътиборига ҳавола этилади.Шерзодхон Қудратхўжаев, Халқаро пресс-клуб раиси.
Тарихий тадбирда Амир Темур ҳазратларининг дунёга келгунича, туғилиш, болалик ва балоғат ёшидаги ҳаётидан, ватанини босқинчилар зулмидан озод этиш, давлатчилик асослари, мамлакат бошқарувидаги энг муҳим фалсафий жиҳатлар театрлаштирилган саҳналар орқали очиб берилади. Амир Темур туғилиб, вояга етган қишлоққа илк бор келиб турган хорижлик сайёҳлар, қашқадарёлик олимлар фикри жамоатчиликка етказилади.
Тадбир доирасида таниқли санъаткорлар иштирокида концерт дастури намойиш этилади.
Изоҳ (0)