Andijon shahrining 6-umumta’lim maktabi o‘qituvchilari 5-aprel kuni aeroportga boradigan yo‘lning chetiga gul ekdi. Bu haqda Komil Jalilov nomli foydalanuvchi Facebook’dagi “Xalq bilan muloqot” guruhida hikoya qiladi.
Ismi sir qolishini so‘ragan o‘qituvchining yig‘lamsirab gapirgan ovozida alam bor edi:
“Siz hammaga ayting, Prezidentga yetkazing, shahar hokimi Dilmurod Rahmatullayev jonimizdan o‘tkazib yubordi. O‘qituvchi xor bo‘ldi, o‘qituvchi odam o‘rnida bo‘lmadi, o‘qituvchi bugun hokimning mardikori bo‘ldi. O‘z yonimizdan gul olsak, darslarimizni o‘tolmasak, bizni hokim odam o‘rnida ko‘rmasa, dodimizni kimga aytaylik? Mana, hozir ham aeroportni yo‘lida ishlayapmiz. Rasmga ol desangiz, hozir olib jo‘natamiz. Xalq ko‘rsin, ularning farzandlariga ta’lim berayotgan o‘qituvchining bugungi ahvolini. Ertaga bolalarimiz besavod bo‘lib qolyapti desa, bizni emas, hokimning bo‘ynidan olsin”, — dedi g‘azab va nafratdan o‘zini to‘xtata olmagan o‘qituvchi.
Ismi sir qolishini so‘ragan boshqa bir o‘qituvchi esa, ularning ustidan hatto mahalliy aholi ham kulayotgani haqida gapiradi:
“O‘tgan kuni erkak o‘qituvchilarimiz to‘rt qavatli binoning oldidagi yerni ag‘darish, ayollarimiz esa ko‘chani supurish bilan band edik. Ikkinchi qavatdagi bir odam balkonida sigaret chekib turib, bizdan qayerda ishlaysizlar, deb so‘radi. Biz o‘qituvchimiz desak, oyliklaringni halol qilib olinglar, tozalab supuringlar, deb kuldi. Ishonasizmi, bizning Andijonda o‘qituvchilarni maktabdan tashqarida ishlatish hech qachon to‘xtamagan. Hokim Dilmurod Rahmatullayev muxbirlarga maktab hovlisidan tashqarida o‘qituvchilar ishlamaydi deb videoda va’da bergan edi. Lekin, o‘qituvchilarni majburiy mehnatdan xalos qilish emas, balki bundan battar bo‘lyapti”, — deydi o‘qituvchi.
O‘qituvchi bir oydan beri shug‘ullangan ishlarini birma-bir sanab o‘tdi:
1. 5-mikrorayondagi domlar oralarida yer chopdik.
2. Domlar orasidagi noqonuniy qurilmalarni buzdik.
3. Domlar devorlarini oqlab berdik.
4. Domlar orasidagi yerlarni ag‘darib egat oldik, gul ekdik.
5. Butalmagan nihollar va daraxtlarga shakl berdik.
6. Navoiy prospekti, Prezident kelsa yuradigan Bo‘ston yo‘lini begona o‘tlardan tozaladik.
7. O‘zimiz ekkan gullarga, ancha uzoqdan paqirlab suv tashib quydik.
8. Qabristonni tozalab supurdik, ortiqcha daraxtlarni kesdik.
Andijon shahridagi maktablardan birining ismi sir qolishini so‘ragan direktorining aytishicha, shahar hokimi ularni holu-joniga qo‘ymayapti:
“Har kuni uch mahal majlis. Har kuni hokim shahar xalq ta’limi mudiriga, maktab-kollejlar direktorlariga uchastkalarni tozalash uchun bo‘lib beradi va har kuni kechqurun o‘sha uchastkalarni borib ko‘radi. Bizning maktabda erkak o‘qituvchi deyarli darsda yo‘q. Ular har kuni maktabga o‘qituvchi kiyimida emas, ishchi kiyimida kelishga, o‘zlari bilan belkurak, ketmon, bolta olib kelishga o‘rganib ham qolishdi. Ayol o‘qituvchilarimiz esa supurgi bilan keladi. Har kuni maktabimizning teng yarim o‘qituvchilarini ko‘chaga chiqarishga majburman. Bo‘lmasa, hokimdan kun yo‘q. Odam chiqarmagan direktorning maktabiga tekshiruvchilarni yuboradi”, — deydi maktab direktori.
Uning aytishicha, o‘qituvchilarning darslari ham o‘lda-jo‘lda bo‘lib qoldi:
“Tasavvur qiling, yarim o‘qituvchi bo‘lmagan maktabda qanaqa dars bo‘lishini? Qolgan o‘qituvchilar, garchi mutaxassisligi to‘g‘ri kelmasada, boshqalarning darsini o‘tib turadi. Lekin bu ham hamma darsga yetmaydi. O‘quvchilar ikki-uch soat dars o‘tganidan keyin muallim bo‘lmagani sababli javob berib yuboryapmiz. Bu birgina mening maktabimda emas, hamma maktablarda shu ahvol. Prezidentga shaharni chiroyli ko‘rsatish uchun hokim o‘qituvchilar vaqtini qurbon qilyapti, bolalarning bilim olishiga to‘sqinlik qilyapti”, — deydi maktab direktori.
Xalq ta’limi vazirligining D. Yenikeyeva o‘limi munosabati bilan yuborilgan murojaatga javobida “Vazirlik majburiy mehnatning har qanday ko‘rinishlariga mutlaqo qarshi va pedagoglarning o‘z kasbiga aloqasi bo‘lmagan ishlarga jalb qilinishiga yo‘l qo‘ymaydi” deyiladi. Andijonlik o‘qituvchi yuqorida sanab o‘tgan ishlar pedagog kasbiga aloqadormi?
Izoh (0)