Андижон шаҳрининг 6-умумтаълим мактаби ўқитувчилари 5 апрель куни аэропортга борадиган йўлнинг четига гул экди. Бу ҳақда Комил Жалилов номли фойдаланувчи Facebook’даги «Халқ билан мулоқот» гуруҳида ҳикоя қилади.
Исми сир қолишини сўраган ўқитувчининг йиғламсираб гапирган овозида алам бор эди:
«Сиз ҳаммага айтинг, Президентга етказинг, шаҳар ҳокими Дилмурод Раҳматуллаев жонимиздан ўтказиб юборди. Ўқитувчи хор бўлди, ўқитувчи одам ўрнида бўлмади, ўқитувчи бугун ҳокимнинг мардикори бўлди. Ўз ёнимиздан гул олсак, дарсларимизни ўтолмасак, бизни ҳоким одам ўрнида кўрмаса, додимизни кимга айтайлик? Мана, ҳозир ҳам аэропортни йўлида ишлаяпмиз. Расмга ол десангиз, ҳозир олиб жўнатамиз. Халқ кўрсин, уларнинг фарзандларига таълим бераётган ўқитувчининг бугунги аҳволини. Эртага болаларимиз бесавод бўлиб қоляпти деса, бизни эмас, ҳокимнинг бўйнидан олсин», — деди ғазаб ва нафратдан ўзини тўхтата олмаган ўқитувчи.
Исми сир қолишини сўраган бошқа бир ўқитувчи эса, уларнинг устидан ҳатто маҳаллий аҳоли ҳам кулаётгани ҳақида гапиради:
«Ўтган куни эркак ўқитувчиларимиз тўрт қаватли бинонинг олдидаги ерни ағдариш, аёлларимиз эса кўчани супуриш билан банд эдик. Иккинчи қаватдаги бир одам балконида сигарет чекиб туриб, биздан қаерда ишлайсизлар, деб сўради. Биз ўқитувчимиз десак, ойликларингни ҳалол қилиб олинглар, тозалаб супуринглар, деб кулди. Ишонасизми, бизнинг Андижонда ўқитувчиларни мактабдан ташқарида ишлатиш ҳеч қачон тўхтамаган. Ҳоким Дилмурод Раҳматуллаев мухбирларга мактаб ҳовлисидан ташқарида ўқитувчилар ишламайди деб видеода ваъда берган эди. Лекин, ўқитувчиларни мажбурий меҳнатдан халос қилиш эмас, балки бундан баттар бўляпти», — дейди ўқитувчи.
Ўқитувчи бир ойдан бери шуғулланган ишларини бирма-бир санаб ўтди:
1. 5-микрорайондаги домлар ораларида ер чопдик.
2. Домлар орасидаги ноқонуний қурилмаларни буздик.
3. Домлар деворларини оқлаб бердик.
4. Домлар орасидаги ерларни ағдариб эгат олдик, гул экдик.
5. Буталмаган ниҳоллар ва дарахтларга шакл бердик.
6. Навоий проспекти, Президент келса юрадиган Бўстон йўлини бегона ўтлардан тозаладик.
7. Ўзимиз эккан гулларга, анча узоқдан пақирлаб сув ташиб қуйдик.
8. Қабристонни тозалаб супурдик, ортиқча дарахтларни кесдик.
Андижон шаҳридаги мактаблардан бирининг исми сир қолишини сўраган директорининг айтишича, шаҳар ҳокими уларни ҳолу-жонига қўймаяпти:
«Ҳар куни уч маҳал мажлис. Ҳар куни ҳоким шаҳар халқ таълими мудирига, мактаб-коллежлар директорларига участкаларни тозалаш учун бўлиб беради ва ҳар куни кечқурун ўша участкаларни бориб кўради. Бизнинг мактабда эркак ўқитувчи деярли дарсда йўқ. Улар ҳар куни мактабга ўқитувчи кийимида эмас, ишчи кийимида келишга, ўзлари билан белкурак, кетмон, болта олиб келишга ўрганиб ҳам қолишди. Аёл ўқитувчиларимиз эса супурги билан келади. Ҳар куни мактабимизнинг тенг ярим ўқитувчиларини кўчага чиқаришга мажбурман. Бўлмаса, ҳокимдан кун йўқ. Одам чиқармаган директорнинг мактабига текширувчиларни юборади», — дейди мактаб директори.
Унинг айтишича, ўқитувчиларнинг дарслари ҳам ўлда-жўлда бўлиб қолди:
«Тасаввур қилинг, ярим ўқитувчи бўлмаган мактабда қанақа дарс бўлишини? Қолган ўқитувчилар, гарчи мутахассислиги тўғри келмасада, бошқаларнинг дарсини ўтиб туради. Лекин бу ҳам ҳамма дарсга етмайди. Ўқувчилар икки-уч соат дарс ўтганидан кейин муаллим бўлмагани сабабли жавоб бериб юборяпмиз. Бу биргина менинг мактабимда эмас, ҳамма мактабларда шу аҳвол. Президентга шаҳарни чиройли кўрсатиш учун ҳоким ўқитувчилар вақтини қурбон қиляпти, болаларнинг билим олишига тўсқинлик қиляпти», — дейди мактаб директори.
Халқ таълими вазирлигининг Д. Еникеева ўлими муносабати билан юборилган мурожаатга жавобида «Вазирлик мажбурий меҳнатнинг ҳар қандай кўринишларига мутлақо қарши ва педагогларнинг ўз касбига алоқаси бўлмаган ишларга жалб қилинишига йўл қўймайди» дейилади. Андижонлик ўқитувчи юқорида санаб ўтган ишлар педагог касбига алоқадорми?
Изоҳ (0)