Qoraqalpog‘istonning Beruniy tumanida yashovchi Ravshan Yaxshimurodov Birinchi Prezident Islom Karimov xotirasiga bag‘ishlab Toshkent shahrigacha piyoda yurib bormoqchi ekanini ma’lum qilgani haqida xabar berilgan edi. “KRuz.uz” sayti Ravshan Yaxshimurodovdan kichik intervyu oldi.
“Yaqinlarimning takliflariga ko‘ra hamda tegishli tashkilotlar mutaxassislari tomonidan ob-havo sharoitlarini hisobga olib, bergan tavsiyalariga ko‘ra start sanasi Navro‘z ayyomidan keyinga ko‘chirildi. Bunda 1990-yil mart oyining oxirgi 10 kunligida O‘zbekistonda prezidentlik joriy qilinganligi ham hisobga olinishi mumkin”, — deydi Ravshan Yaxshimurodov sayt bilan suhbatda.
Beruniy qishloq xo‘jalik kasb-hunar kollejida texnik xodim sifatida faoliyat yurituvchi Ravshan Yaxshimurodov 1200 kilometr yo‘lni piyoda bosib o‘tishdan maqsadi haqida quyidagilarni ma’lum qiladi:
—Maqsadim Islom Karimov xotirasiga hurmat va yoshlarga vatanparvarlik va jasorat namunasini ko‘rsatish, shu yo‘l bilan mamlakatimizda tinchlik va osoyishtalikning qadriga yetish va uni asrashga da’vat etishdir.
—Safar davomida quyidagilarni rejalashtirganman:
- Marafon davomida Samarqand shahriga kirib, Birinchi Prezidentimizning qabrini ziyorat qilish va ularning qarindoshlari va sinfdoshlari bilan uchrashib suhbatlashish, o‘qigan maktabiga kirish.
- Toshkent shahriga borib Islom Karimov o‘qigan oliy o‘quv yurtlariga kirib talabalar bilan uchrashish.
- Birinchi Prezidentimiz ancha vaqt faoliyat olib borgan Oqsaroy qarorgohi oldidagi birinchi prezidentimiz siymoysi tushirilgan haykalni ziyorat qilish.
- Yakunida shular haqida kitob qilib yozish.
Izoh (0)