Tashqi savdo vaziri o‘rinbosari Sohib Saifnazarov boshchiligidagi ishchi guruh Tbilisida bir qator vazirlik, idora va kompaniyalar bilan uchrashuvlar o‘tkazdi. Bu haqda vazirlik matbuot xizmati ma’lum qildi.
Gruziya iqtisodiyot va barqaror rivojlanish vazirligida bo‘lib o‘tgan uchrashuvda, Tbilisida iqtisodiy hamkorlik bo‘yicha hukumatlararo komissiyaning navbatdagi uchrashuvini o‘tkazish masalalari muhokama qilindi. Uning doirasida maxsus bitimlar va shartnomalar tuzish, xususan, transport va logistika sohasida hamkorlik, Tbilisida qo‘shma savdo uyining ochilishi muhokama qilinishi rejalashtirilgan.
“Gruziya temir yo‘llari” OAJ rahbariyati bilan bo‘lgan uchrashuvda temir yo‘l sohasidagi aloqalarni yanada rivojlantirish, xalqaro transport koridorlaridan samarali foydalanish va ikki davlat temir yo‘llari orqali tranzit yuklarini tashish hajmini ko‘paytirish bo‘yicha kelishuvlarga erishildi. Ushbu muzokaralar natijasi sifatida, Gruziya tomonidan barcha turdagi o‘zbek mahsulotlari tashib o‘tilishi uchun 50 foiz chegirma belgilandi.
Gruziya qishloq xo‘jaligi vazirligi va Tblisi meriyasida O‘zbekistonda ishlab chiqariladigan avtomobil va qishloq xo‘jaligi texnikasi taqdimoti bo‘lib o‘tdi. Yirik mahalliy avtodilerlar bilan uchrashuvlar o‘tkazildi.
“Gruziya tomonidan O‘zbekistonda ishlab chiqariladigan avtomobil va qishloq xo‘jaligi mashinasozligi mahsulotlariga jonli qiziqish ko‘rsatildi. Shahar ehtiyojlari uchun avtobuslar hamda qishloq xo‘jaligi korxonalari uchun mexanizatsiyalashgan mahsulotlarni yetkazib berish bo‘yicha tenderlarda faol ishtirok etishga taklif qilishdi, — ta’kidladi S. Saifnazarov.
Shuningdek, vinochilik va vino mahsulotlari eksportini rivojlantirish bo‘yicha Gruziyaning tegishli idoralari bilan muzokaralar olib borildi. Gruziya qishloq xo‘jaligi vazirligi huzuridagi Vino milliy agentligida bo‘lgan uchrashuv natijasida tajriba almashish, uzumchilik va vinochilik sohasidagi hamkorlikni rivojlantirish, vino-aroq mahsulotlarini sertifikatsiya qilish bo‘yicha kelishuvlarga erishildi.
Uzum va mevali daraxtlarni ko‘paytirish milliy markazi bilan imzolangan o‘zaro hamkorlik memorandumiga ko‘ra, xomashyo bazasini o‘rganish va moslashtirilgan uzum ko‘chatlarini yetishtirish, ekish va import qilishdagi istiqbolli yo‘nalishlarni belgilash uchun O‘zbekistonga yetakchi mutaxassislar jalb qilinadigan bo‘ldi.
Izoh (0)