Ташқи савдо вазири ўринбосари Соҳиб Саифназаров бошчилигидаги ишчи гуруҳ Тбилисида бир қатор вазирлик, идора ва компаниялар билан учрашувлар ўтказди. Бу ҳақда вазирлик матбуот хизмати маълум қилди.
Грузия иқтисодиёт ва барқарор ривожланиш вазирлигида бўлиб ўтган учрашувда, Тбилисида иқтисодий ҳамкорлик бўйича ҳукуматлараро комиссиянинг навбатдаги учрашувини ўтказиш масалалари муҳокама қилинди. Унинг доирасида махсус битимлар ва шартномалар тузиш, хусусан, транспорт ва логистика соҳасида ҳамкорлик, Тбилисида қўшма савдо уйининг очилиши муҳокама қилиниши режалаштирилган.
«Грузия темир йўллари» ОАЖ раҳбарияти билан бўлган учрашувда темир йўл соҳасидаги алоқаларни янада ривожлантириш, халқаро транспорт коридорларидан самарали фойдаланиш ва икки давлат темир йўллари орқали транзит юкларини ташиш ҳажмини кўпайтириш бўйича келишувларга эришилди. Ушбу музокаралар натижаси сифатида, Грузия томонидан барча турдаги ўзбек маҳсулотлари ташиб ўтилиши учун 50 фоиз чегирма белгиланди.
Грузия қишлоқ хўжалиги вазирлиги ва Тблиси мериясида Ўзбекистонда ишлаб чиқариладиган автомобиль ва қишлоқ хўжалиги техникаси тақдимоти бўлиб ўтди. Йирик маҳаллий автодилерлар билан учрашувлар ўтказилди.
«Грузия томонидан Ўзбекистонда ишлаб чиқариладиган автомобиль ва қишлоқ хўжалиги машинасозлиги маҳсулотларига жонли қизиқиш кўрсатилди. Шаҳар эҳтиёжлари учун автобуслар ҳамда қишлоқ хўжалиги корхоналари учун механизациялашган маҳсулотларни етказиб бериш бўйича тендерларда фаол иштирок этишга таклиф қилишди, — таъкидлади С. Саифназаров.
Шунингдек, виночилик ва вино маҳсулотлари экспортини ривожлантириш бўйича Грузиянинг тегишли идоралари билан музокаралар олиб борилди. Грузия қишлоқ хўжалиги вазирлиги ҳузуридаги Вино миллий агентлигида бўлган учрашув натижасида тажриба алмашиш, узумчилик ва виночилик соҳасидаги ҳамкорликни ривожлантириш, вино-ароқ маҳсулотларини сертификация қилиш бўйича келишувларга эришилди.
Узум ва мевали дарахтларни кўпайтириш миллий маркази билан имзоланган ўзаро ҳамкорлик меморандумига кўра, хом ашё базасини ўрганиш ва мослаштирилган узум кўчатларини етиштириш, экиш ва импорт қилишдаги истиқболли йўналишларни белгилаш учун Ўзбекистонга етакчи мутахассислар жалб қилинадиган бўлди.
Изоҳ (0)