2017-yil 7-aprelida Shvetsiya poytaxti Stokgolmda terakt uyushtirishda ayblanayotgan o‘zbekistonlik Rahmat Oqilov sudda ko‘rsatma berishni boshladi. Bu haqda “RIA Novosti” xabar bermoqda.
Terakt yuzasidan sud ishi 13-fevral kuni prokuratura materiallari bilan tanishishdan boshlandi. Eshituvlarning oxirgi kuni 9-mayga belgilangan, sud qarori iyun oyining ikkinchi yarmida chiqarilishi rejalashtirilgan.
Sud chog‘ida o‘z motivlari haqida gapirar ekan, Rahmat Oqilov Shvetsiya IShIDga qarshi kurashda ishtirok etishdan to‘xtashini istaganini bildirdi.
Oldinroq Shvetsiya prokuraturasi Rahmat Oqilov jinoyatni IShID nomidan amalga oshirib, Shvetsiya aholisi orasida qo‘rquv uyg‘otish yo‘li bilan hukumatni IShIDga qarshi operatsiyadan voz kechishga undashni rejalashtirganini bildirgan edi. Ammo IShIDning o‘zi terakt uchun javobgarlikni zimmasiga olmadi.
Eslatib o‘tamiz, terakt oqibatida besh kishi halok bo‘lgan, 15 kishi yaralangan edi. Bosh gumondor — 39 yoshli Rahmat Oqilov o‘sha kuni hibsga olingan edi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)