O‘zbekiston Prezidenti Shavkat Mirziyoyev 2018-yildan boshlab viloyatlarga safarlari vaqtida o‘tkazilayotgan yig‘ilishlarda hududdagi har bir tuman vakillari bilan bevosita muloqot qilmoqda, tuman faollarining murojaatlari va iltimoslari bilan shaxsan o‘zi tanishmoqda.
Bu an’ana Prezidentning 19—20-yanvar kunlari Surxondaryoga amalga oshirgan tashrifidan boshlandi. Qiziriqda o‘tgan yig‘ilishda: “Shunday taklif bor — har bir tumanning murojaatlarini tinglaymiz”, — degandi Shavkat Mirziyoyev. Murojaatlarni tinglash Chiroqchi va Peshku yig‘ilishlarida ham davom etdi.
Prezident raisligida o‘tgan uchala yig‘ilishda tumanlar vakillari nimalarni gapirgani haqida “O‘zbekiston 24” reportajlari orqali tasavvur hosil qilish mumkin. Murojaatlar turfa — kimdir yo‘llar ta’mirtalab ekanidan shikoyat qilgan, boshqa birov yangi ishlab chiqarish quvvatlari va ishchi o‘rinlarini yaratish zarurligini aytgan, yana bir tumanning vakili sug‘orish uchun suv ombori qurishni so‘ragan.
Lekin murojaatlarning asosiy qismi ichimlik suvi muammosi bilan bog‘liq. To‘g‘ri, Surxondaryoda yig‘ilishda ichimlik suvi bilan bog‘liq faqat bitta murojaat bo‘ldi va u ham, ochig‘ini aytganda, minnatdorlik so‘zlari edi. Biroq Qashqadaryo va Buxorodagi yig‘ilishlarda muammo biroz jiddiyroq ekani sezildi.
Boysun, Surxondaryo
Boysundan so‘z olgan oqsoqol-hoji “ajdodlar ming-minglab yillar davomida suv, suv, suv deb o‘tib ketgani”ni ta’kidlab, faqat Shavkat Mirziyoyevning qaroridan so‘ng, Boysundagi qator qishloqlarni ichimlik suvi bilan ta’minlashga doir loyiha bo‘yicha ishlar olib borilayotganini eslatib o‘tdi.Haqiqatan ham, 2018 yil sentabri arafasida Boysundagi “Xo‘jamayxona” bulog‘i suvi tuman markaziga yetib borishi, tog‘li tumanga 36 kilometr masofadan toza ichimlik suvi olib kelish uchun 58 milliard so‘m mablag‘ yo‘naltirilgani haqida xabar berilgan edi.
“Xalq mendan bir narsani iltimos qildi: ey oqsoqol-hoji, sizga shunday imkoniyat berildi, Prezidentimizga bizning nomimizdan ayting, to‘rt-besh oydan so‘ng suv kelganida, Prezident Boysunimizda mehmon bo‘lsin, bizdan ham bir piyola suv ichsin”, — dedi boysunlik otaxon.
“O‘zbekiston 24”da e’lon qilingan reportajga ko‘ra, Shavkat Mirziyoyev bu so‘zlarga shunday javob qaytargan: “Haqiqatan ham, suv masalasi — og‘ir masala. Qanchalik qiyin bo‘lmasin, Xudo xohlasa, suv keladi”.
Dehqonobod, Qashqadaryo
Prezident hozirgacha Surxondaryo, Qashqadaryo va Buxoro viloyatlariga tashrif buyurgan bo‘lsa, eng ayanchli vaziyat Dehqonobodda ekani ma’lum bo‘ldi — tumanning ichimlik suvi bilan ta’minlanganlik darajasi atigi ikki foizga teng.“Ma’ruzangizda ichimlik suvi haqida gapirdingiz. Biz, dehqonobodliklar, to‘g‘risini aytganda, juda ham xursand bo‘ldik. Chunki Dehqonobod ahlining qariyb 100 yildan buyon, asriy orzusini birgina jasoratli qaroringiz bilan ro‘yobga chiqardingiz”, — dedi Dehqonobod nomidan fikr bildirgan o‘qituvchi ayol.
Prezident bunga javoban tumandagi ichimlik suvi bilan bog‘liq vaziyatni yaxshilash bo‘yicha topshiriq berganini ma’lum qildi.
Dehqonobodliklarning oldida mening ham o‘z niyatlarim bor. Dehqonobodda ham, asta-sekin bo‘lsa-da, sizlar sezadigan darajada o‘zgarishlar bo‘ladi. Ichimlik suvi ta’minoti 2 foiz ekanini ko‘rib, juda qiynaldim. Qanchalar og‘ir bo‘lmasin, Xudo xohlasa, sizlarga ichimlik suvi yetkazib berish bo‘yicha juda qattiq harakat qilamiz. Topshiriq berdim.Shavkat Mirziyoyev, O‘zbekiston Prezidenti
Mirishkor, Qashqadaryo
Mirishkor tumani vakili toza ichimlik suvi masalasi ko‘p yillardan buyon aholini tashvishga solayotgani, hududdagi 113 ming aholi uchun ichimlik suv asosan tashib keltirilishini ma’lum qili. “Quvurlar eskirib, yaroqsiz holga kelib qolgani tufayli, ba’zan ichimlik suvi ta’minotida uzilishlar bo‘lib, aholi texnik suv ichishga majbur bo‘lmoqda”, — dedi mirishkorlik oqosoqol.Xudo xohlasa, bu masalani albatta hal qilamiz. Nimaga desangiz, Qashqadaryoda ichimlik suvi masalasi juda og‘ir. Jumladan, Mirishkorda ham og‘irligini bilaman.Shavkat Mirziyoyev, O‘zbekiston Prezidenti
Muborak, Qashqadaryo
Muborakda ham toza ichimlik suvi — hudud aholisining asriy orzusi ekani aytildi. “Muborak shahridagi ichimlik suvi muammosi bizni qiynab keladi. Agar shaharda ichimlik suvi muammosini hal qilib bersangiz, shaharda mevali va manzarali daraxtlar ekkan bo‘lardik”, — dedi tuman faoli.Mazkur murojaat bo‘yicha Prezident yig‘ilishning o‘zida O‘zbekiston Uy-joy kommunal xizmat vazirligi rahbari Muzaffar Soliyevga ko‘rsatma berib, kerak bo‘lsa Vazirlar Mahkamasining qarorini ham chiqarib berishini ta’kidladi.
Shofirkon, Buxoro
Shofirkonlik oqsoqol uchta masala bo‘yicha murojaat qildi, ularning biri ichimlik suvi bilan bog‘liq. “Shofirkon 25 foizga ichimlik suvi bilan ta’minlangan, suv tuman markazigacha kelgan. Endi buni hududlarga, xonadonlargacha yetkazish muammosi bor. Agar imkoniyat bo‘lsa, shu masala dasturlarga kiritilib, oxiriga yetkazilsa, xalqimiz ichimlik suvi bilan ta’minlashda yordam bo‘lardi”, — dedi Shofirkon vakili.Prezident ichimlik suvi bilan ta’minlanganlik darajasi butun viloyat bo‘yicha 51 foizga tengligini va bu ko‘rsatkichga ham so‘nggi bir yilda erishilganini ta’kidlab, Shofirkonga bu masalada yordam ko‘rsatilishini, yig‘ilish protokoliga bu bo‘yicha tegishli band kiritilishini aytdi.
Jondor, Buxoro
Ichimlik suvi ta’minoti viloyatimizda 51 foizni tashkil qilsa, bizning tumanimizda 28,9 foizni tashkil etadi. Quvurlarning 60 foizdan ortig‘i ta’mirtalab bo‘lib qolgan. Ayniqsa, Romish, Nurobod, Xumen, Po‘loti, Samoncho‘g‘, Xumdanak hududlarimizda aholi uchun suv manbalari yo‘qligi sabab, suv tashib keltiriladi. Amaliy yordam bersangiz, yanada xursand bo‘lardik.“Keltirgan raqamlaringiz — haqiqat. Buni o‘zim ham bilaman”, — deb aytgan Prezident yig‘ilishning o‘zida iqtisodiyot vaziri birinchi o‘rinbosari Sunnatilla Bekenov va uy-joy kommunal xizmat vaziri Muzaffar Soliyevga quvurlarni yangilash bo‘yicha taklif tayyorlash haqida ko‘rsatma bergan edi.
Kogon tumani, Buxoro
Kogon tumani nomidan murojaat qilgan onaxon hududda “bittagina muammo” borligini aytib, aholining faqat 40 foizi ichimlik suvi bilan ta’minlanganini, boz ustiga, o‘tgan asrning 70-yillarida yotqizilgan suv quvurlari ta’mirtalab holga kelib qolganini bildirdi.Prezident quvurlarning barini birdan yangilash biroz qiyin ekanini tan oldi. O‘z navbatida, yig‘ilishda mutasaddilarga “kerak bo‘lsa, qo‘shimcha pul ajratish” yo‘li bilan suv muammosini hal qilish lozimligini uqtirdi.
Izoh (0)