Meksikada bir vaqtning o‘zida 54 ta delfin o‘zini qirg‘oqqa otdi

Bir vaqtning o‘zida 54 ta delfin o‘zini Meksikaning Janubiy Quyi Kaliforniya shtatidagi dengiz qirg‘og‘iga otdi. Bu haqida Lotin Amerikasining atrof-muhit muhofazasi bilan shug‘ullanuvchi prokuraturasi ma’lum qildi, deb xabar berdi “RIA Novosti”.

Idoraning ma’lumotlariga ko‘ra, tezkor ravishda amalga oshirilgan qutqaruv ishlari davomida 33 ta sut emizuvchi qutqarib qolingan, biroq 21 tasi halok bo‘lgan.

Mutaxassislarning aytishicha, halok bo‘lgan hayvonlarning jasadi o‘rganib chiqilgan va ularning qirg‘oqqa o‘zini otishlariga boshqa turdagi delfinlarning hujumi sabab bo‘lgan degan xulosaga kelingan. Chunki delfin jasadlarida boshqa hayvonlar tomonidan yetkazilgan jarohat izlari mavjud.