Toshkent shahridagi ko‘p qavatli uylardan birida ijarada yashayotgan yigit xonadon egasining uyni bo‘shatib bering, degan iltijolariga parvo ham qilmadi. Shunda xonadon sohibasi yaxshi gapga ko‘nmagan ijarachini chiqarib yuborish uchun Majburiy ijro byurosi xodimlaridan yordam so‘radi, deb xabar berdi O‘zA.
Majburiy ijro byurosi xodimlari mazkur xonadonning eshigini taqillatgan, biroq u ochilavermagach, byuro xodimlari uni buzishga majbur bo‘lgan. Eshik ochilib, xonadonga qadam qo‘yganlar bu yer odam yashaydigan uy emas, go‘yoki, kichik farmatsevtika korxonasi ekanligini ko‘rgan.
“Yashirin sex” ustidan chiqqan xodimlar bu haqda O‘zbekiston Respublikasi Bosh prokuraturasi huzuridagi soliq, valyutaga oid jinoyatlarga va jinoiy daromadlarni legallashtirishga qarshi kurash departamentining Toshkent shahar Olmazor tumani bo‘limiga xabar qildi. Xonadonda 18 turdagi qo‘lbola usulda tayyorlangan kapsulalar, ularni qadoqlash uchun mo‘ljallangan asbob-uskunalar, bo‘sh ampulalar, etiketkalar borligi aniqlandi.
Ushbu holat yuzasidan surishtiruv ishlari olib borish jarayonida soxta tadbirkorlik bilan shug‘ullanib kelgan Bahriddin ismli shaxs dorilarni qo‘lbola usulda tayyorlab, ularni sotish bilan shug‘ullanib kelgani ayon bo‘ldi.
Ashyoviy dalil sifatida olingan dorilar sud-kimyoviy ekspertizasining xulosasiga ko‘ra, odam mushaklarini rivojlantirish uchun ishlatiladigan turli xil moddalar birikmalaridan tashkil topgan. O‘z navbatida, dori ishlab chiqarish bo‘yicha ruxsatnomaga, bilim va tajriba, zarur sharoitga ega bo‘lmagan odam tomonidan “yaratilgan” bu dorilar iste’molga mutlaqo yaroqsiz bo‘lib, inson salomatligiga jiddiy putur yetkazishi ham turgan gap. Olmazor tumani davlat sanitariya-epidemiologiya nazorat markazi xulosasida ham bu bayon etilgan.
Surishtiruv-tergov jarayoni davom etayotgan paytda soxta tadbirkor yana bir “tadbir”ni amalga oshirishga, ya’ni qalbaki dorilarni xaspo‘lashga urinib ko‘rdi. Shu niyatda “500 dollar beray, ishimni yopib yuboring” deyaverib surishtiruvchini holi-joniga qo‘ymadi. Surishtiruvchining xizmat xonasiga kelgan “tadbirkor” stol ustida turgan yondaftarcha ichiga “xamir uchidan patir” deb 100 dollar solib qo‘ygan. U surishtiruvchiga qarab “dorilarimni qaytarib, ishni yopsangiz, qolganini keltiraman”, deyishni ham unutmagan.
Xonaga o‘rnatilgan videoyozuv moslamasiga qayd etilayotgan bu holat mavjud ashyoviy dalilga yana bir dalilni qo‘shib qo‘ydi.
“Sudlanuvchiga qo‘yilgan barcha ayblar ekspertiza xulosasi, ko‘zdan kechirish, olib qo‘yish va muhrlash bayonnomasi, xatlangan dori vositalari dalolatnomasi, tadbir jarayoni yozib olingan video lavha hamda jinoyat ishida to‘plangan boshqa hujjatlar bilan isbotlandi. Unga jazo tayinlashda jinoyatning og‘irlashtiruvchi va yengillashtiruvchi barcha holatlari hisobga olindi. Sudlanuvchiga ikki yil muddatga dori vositalari bilan savdo qilish huquqidan mahrum qilingan holda uch yildan ortiqroq muddatga ozodlikdan mahrum qilish jazosi tayinlandi”, — dedi Jinoyat ishlari bo‘yicha Toshkent shahar Olmazor tuman sudi sudyasi Muso Yusupov.
Izoh (0)