O‘zbekiston Prezidenti Shavkat Mirziyoyev 2018-yil yanvarida Surxondaryoga tashrifi davomida bo‘lib o‘tgan yig‘ilishda Milliy xavfsizlik xizmati raisi sobiq birinchi o‘rinbosari Shuhrat G‘ulomovni “sotqin” deb atagani ma’lum bo‘ldi.
Prezident MXXning sobiq mulozimini xoinlikda ayblayotgani yozilgan audio fevral oyida ijtimoiy tarmoqlarda tarqaldi, OAV tomonidan qayta e’lon qilindi.
Bu — O‘zbekiston Prezidenti u yoki bu (sobiq) amaldorni xoinlikda ayblagani jamoatchilikka oshkor etilishi bilan bog‘liq ikkinchi holatdir. Shavkat Mirziyoyev bungacha 2017-yil 22-dekabrida, Oliy Majlisga Murojaatnoma yo‘llash vaqtida sobiq ichki ishlar vaziri Adham Ahmedboyevni “sotqinligi uchun” ishdan olinganini ma’lum qilgandi.
Prezident Murojaatnoma vaqtida Oliy sud raisi Kozimjon Komilovga yuzlanib: “Ahmedboyevning generallik unvonlari qaytarib olinganini, hozir qayerda yurganini bilasan. Sotqinligi, xiyonatchiligi uchun”, — degan edi.
Ma’lumot uchun, Jinoyat kodeksining 157-moddasiga ko‘ra, davlatga xoinlik qilish, ya’ni, O‘zbekiston fuqarosi tomonidan josuslik, chet el davlatiga, chet el tashkilotiga yoki ularning vakillariga davlat sirlarini yetkazish yoxud O‘zbekistonga qarshi dushmanlik faoliyatini olib borishda boshqacha yordam ko‘rsatish yo‘li bilan mamlakat suverenitetiga, hududiy daxlsizligiga, xavfsizligiga, mudofaa salohiyatiga, iqtisodiyotiga zarar yetkazishga qaratilgan qasddan sodir etilgan qilmish 10 yildan 20 yilgacha ozodlikdan mahrum qilish bilan jazolanadi.
Izoh (0)