Тошкент шаҳридаги кўп қаватли уйлардан бирида ижарада яшаётган йигит хонадон эгасининг уйни бўшатиб беринг, деган илтижоларига парво ҳам қилмади. Шунда хонадон соҳибаси яхши гапга кўнмаган ижарачини чиқариб юбориш учун Мажбурий ижро бюроси ходимларидан ёрдам сўради, деб хабар берди ЎзА.
Мажбурий ижро бюроси ходимлари мазкур хонадоннинг эшигини тақиллатган, бироқ у очилавермагач, бюро ходимлари уни бузишга мажбур бўлган. Эшик очилиб, хонадонга қадам қўйганлар бу ер одам яшайдиган уй эмас, гўёки, кичик фармацевтика корхонаси эканлигини кўрган.
«Яширин цех» устидан чиққан ходимлар бу ҳақда Ўзбекистон Республикаси Бош прокуратураси ҳузуридаги солиқ, валютага оид жиноятларга ва жиноий даромадларни легаллаштиришга қарши кураш департаментининг Тошкент шаҳар Олмазор тумани бўлимига хабар қилди. Хонадонда 18 турдаги қўлбола усулда тайёрланган капсулалар, уларни қадоқлаш учун мўлжалланган асбоб-ускуналар, бўш ампулалар, этикеткалар борлиги аниқланди.
Ушбу ҳолат юзасидан суриштирув ишлари олиб бориш жараёнида сохта тадбиркорлик билан шуғулланиб келган Баҳриддин исмли шахс дориларни қўлбола усулда тайёрлаб, уларни сотиш билан шуғулланиб келгани аён бўлди.
Ашёвий далил сифатида олинган дорилар суд-кимёвий экспертизасининг хулосасига кўра, одам мушакларини ривожлантириш учун ишлатиладиган турли хил моддалар бирикмаларидан ташкил топган. Ўз навбатида, дори ишлаб чиқариш бўйича рухсатномага, билим ва тажриба, зарур шароитга эга бўлмаган одам томонидан «яратилган» бу дорилар истеъмолга мутлақо яроқсиз бўлиб, инсон саломатлигига жиддий путур етказиши ҳам турган гап. Олмазор тумани давлат санитария-эпидемиология назорат маркази хулосасида ҳам бу баён этилган.
Суриштирув-тергов жараёни давом этаётган пайтда сохта тадбиркор яна бир «тадбир»ни амалга оширишга, яъни қалбаки дориларни хаспўлашга уриниб кўрди. Шу ниятда «500 доллар берай, ишимни ёпиб юборинг» деявериб суриштирувчини ҳоли-жонига қўймади. Суриштирувчининг хизмат хонасига келган «тадбиркор» стол устида турган ёндафтарча ичига «хамир учидан патир» деб 100 доллар солиб қўйган. У суриштирувчига қараб «дориларимни қайтариб, ишни ёпсангиз, қолганини келтираман», дейишни ҳам унутмаган.
Хонага ўрнатилган видеоёзув мосламасига қайд этилаётган бу ҳолат мавжуд ашёвий далилга яна бир далилни қўшиб қўйди.
«Судланувчига қўйилган барча айблар экспертиза хулосаси, кўздан кечириш, олиб қўйиш ва муҳрлаш баённомаси, хатланган дори воситалари далолатномаси, тадбир жараёни ёзиб олинган видео лавҳа ҳамда жиноят ишида тўпланган бошқа ҳужжатлар билан исботланди. Унга жазо тайинлашда жиноятнинг оғирлаштирувчи ва енгиллаштирувчи барча ҳолатлари ҳисобга олинди. Судланувчига икки йил муддатга дори воситалари билан савдо қилиш ҳуқуқидан маҳрум қилинган ҳолда уч йилдан ортиқроқ муддатга озодликдан маҳрум қилиш жазоси тайинланди», — деди Жиноят ишлари бўйича Тошкент шаҳар Олмазор туман суди судьяси Мусо Юсупов.
Изоҳ (0)