O‘zbekistonda paxta-to‘qimachilik ishlab chiqaruvchilari hamda fermer xo‘jaliklari o‘rtasida paxta xomashyosini yetishtirish va yetkazib berish borasida to‘g‘ridan-to‘g‘ri kontraktatsiya shartnomasi tuziladigan bo‘ldi. Bu Vazirlar Mahkamasining paxta-to‘qimachilik ishlab chiqarishini tashkil etishning zamonaviy shakllarini joriy etish chora-tadbirlari to‘g‘risidagi qarorida belgilab qo‘yildi, deya xabar bermoqda O‘zA.
Qarorga ko‘ra, O‘zbekistonning turli hududlarida 13 ta paxta-to‘qimachilik ishlab chiqarishi tashkil etiladi. Bu tashkilotlar yer, suv va boshqa resurslardan samarali va oqilona foydalanish, hosildorlikni oshirish, paxta xomashyosini o‘z vaqtida yig‘ib-terib olishga ko‘maklashadi. Shuningdek, paxtani chuqur qayta ishlash va qo‘shimcha qiymatga ega mahsulotlar ishlab chiqarishni ta’minlaydi.
Paxta-to‘qimachilik ishlab chiqarishi doirasida o‘z ehtiyojlari uchun ishlab chiqarilgan paxta tolasi ixtiyoriy asosda sertifikatlanadi. Ishlab chiqaruvchining o‘zi to‘g‘ridan-to‘g‘ri kontraktlar yoki birja savdolari orqali boshqa mahalliy iste’molchilarga mahsulotini sotishiga ruxsat berildi.
Paxta-to‘qimachilik ishlab chiqarish tashkilotchisi tomonidan xarid qilinadigan paxta xom ashyosi narxi fermer xo‘jaliklarining rentabelligi hisobga olinib, agrotexnologik xaritalar asosida amalga oshiriladigan harajatlardan kelib chiqqan holda shartnoma asosida belgilanadi. U davlat ehtiyojlari uchun belgilangan narxlardan past bo‘lmasligi kerak.
Paxta-to‘qimachilik ishlab chiqarish tashkilotlariga kreditlar jamg‘arma mablag‘lari hisobidan yillik 3 foizdan ortiq bo‘lmagan foiz stavkasi bo‘yicha va davlat buyurtmasi doirasida paxta xom ashyosi sotadigan fermer xo‘jaliklarini moliyalashtirish uchun nazarda tutilgan shartlar asosida ajratiladi.
Paxta-to‘qimachilik ishlab chiqarish uchun paxta xomashyosi ishlab chiqarish maqsadida ajratiladigan mablag‘lar fermer xo‘jaligining maxsus hisobraqamiga o‘tkaziladi.
Izoh (0)