Birinchi Prezident Islom Karimov Samarqand shahridagi “Dahbedi” mahallasida tavallud topgan. O‘zA mazkur MFY raisi Orzu Rahmatovga minbar berdi.
Birinchi Prezident dunyoga kelgan 1938-yil, dinga qarshi kurash avj olgan davrda unga Islom deb ism qo‘yilishining o‘zi ulkan jasorat bo‘lgan. Chunki o‘sha, qatag‘on ayni avj pallasiga kirgan yillarda islomiy ism qo‘yish u yoqda tursin, islom dini haqida gapirishning o‘zi xatarli edi.
Ma’lumotlarda yozilishicha, o‘sha yili Samarqand viloyati bo‘yicha 1694 nafar o‘g‘il bola tug‘ilgan va faqat bittasining ismi Islom bo‘lgan ekan. Bu sakkiz farzandni oq yuvib, oq tarab voyaga yetkazgan, yuksak tarbiya bergan Abdug‘ani aka va Sanobar onalarning qanchalik jasorat sohibi bo‘lganliklaridan dalolat.
Bugun mahallamizda 30 nafardan ortiq yoshi 80 dan oshgan nuroniy otaxon va onaxonlar yashaydi. Ularning ko‘pchiligi Islom Karimov bilan birga maktabga borgan, o‘qigan yoki bir guzarda ulg‘aygan. Ularning aytishicha, Islom Karimov bolaligidan mehnat va bir burda nonning qadr-qimmatini yaxshi bilgan. Shuning uchun qayerda va qanday lavozimda ishlamasin, bu mashaqqatli davrni aslo unutmadi.
Ayni paytda mahallamizda 308 xonadon, 2 mingdan ortiq aholi istiqomat qiladi. Ular Birinchi Prezident o‘sgan mahallada yashayotganidan faxrlanishadi, shu nomga munosib bo‘lishga intiladi. Mahallamiz markazida Islom Karimovning hayoti va faoliyatini aks ettiruvchi xona tashkil qilganmiz. Bu yerda yoshlar uchun tashkil etilgan maxsus burchakda ulug‘ davlat arbobining bolalik va o‘quvchilik yillarida olingan suratlar jamlangan.
Islom Karimov tug‘ilib, voyaga yetgan xonadon barcha mahalladoshlar uchun eng qadrli maskanga aylangan. Bu yerdan yurtimiz turli burchaklaridan kelayotgan odamlarning qadami uzilmaydi. Biz shunday buyuk inson bilan bir mahallada yashaganimizdan, ulg‘ayganimizdan doimo faxrlanamiz.
Izoh (0)