O‘zbekiston Prezidentining 2018-yil 16-yanvardagi 5303-son Farmoni bilan 2019-yil 1-yanvariga qadar bojxona to‘lovlari to‘lashdan ozod qilinadigan (bojxona rasmiylashtiruvi uchun yig‘imlar bundan mustasno) oziq-ovqat mahsulotlari va xomashyolarning ayrim turlari ro‘yxati tasdiqlandi, deb xabar berdi Norma.
Unga 8 nomdagi tovarlar kiritildi (qavsda TIF TN bo‘yicha kodlari ko‘rsatilgan):
- tirik yirik qoramol (0102);
- tirik qo‘y va echkilar (0104);
- yirik qoramol go‘shti, barra yoki sovutilgan (0201);
- barra, sovutilgan (muzlatilganidan tashqari) qo‘y yoki echki go‘shti (0204);
- soya loviyasi, maydalangan yoki maydalanmagan (1201);
- kungaboqar urug‘i, maydalangan yoki maydalanmagan (1206 00);
- kunjut urug‘i (1207 40);
- shakarqamish yoki lavlagi shakari va kimyoviy toza saxaroza, qattiq holatda (1701).
Import. O‘zbekistonga yuqorida sanab o‘tilgan tovarlarni olib kelishda “nol” stavka bo‘yicha import bojxona boji solinadi. Ulardan aksiz solig‘i undirilmaydi. Qo‘shimcha qiymat solig‘i 20%ni tashkil etadi. Bojxona rasmiylashtiruvi uchun yig‘im bojxona qiymatining 0,2%ini, biroq kamida $25 va ko‘pi bilan $3 000 ni tashkil etadi (yig‘imni to‘lash majburiyati saqlanib qoladi).
Eksport. O‘zbekistonda 1997-yildan boshlab eksport bojxona bojlari bekor qilingan. Ko‘rsatilgan tovarlardan aksiz solig‘i undirilmaydi. Tovarlarni eksportga realizatsiya qilishga “nol” stavka bo‘yicha QQS solinadi. Bojxona rasmiylashtiruvi uchun yig‘im bojxona qiymatining 0,1%ini, biroq kamida EKIHning 50%ini tashkil etadi (yig‘imni to‘lash majburiyati saqlanib qoladi).
Eslatib o‘tamiz, tirik chorva mollari, go‘sht va shakarni eksport qilish Prezident yoki Hukumat qarorlari asosida amalga oshiriladi.
Hujjat qonun hujjatlari ma’lumotlari milliy bazasida rasman e’lon qilingan va 2018-yil 17-yanvarda kuchga kirdi.
Izoh (0)