Navoiy viloyatining Xatirchi tumanida uch kishi is gazidan vafot etdi, deb yozadi “Sensorika.uz”.
Voqea o‘tgan yil 1-dekabr kuni sodir bo‘lgan. “Xo‘jaqo‘rg‘on” mahalla fuqarolar yig‘ini hududida yashovchi fuqaroning uyida oltinsoylik yaqinlari mehmon bo‘ladi.
Taassufki, mehmondorchilik kutilmagan fojia bilan yakun topadi. Ular ehtiyotsizlik oqibatida is gazidan zaharlanadi. Natijada 3 nafar fuqaro hayotdan bevaqt ko‘z yumadi.
Voqeaga yillar davomida tozalanmagan mo‘ri sabab bo‘lgan. Dudburonga qushlar in qurganligi tufayli chala yonishdan paydo bo‘lgan is gazi xonalarni to‘ldirgan. Gazning chala yonishi bois havoga chiqqan yoqimsiz hid uy ichiga tarqalib, fuqarolarning zaharlanishiga olib kelgan.
Navoiy viloyat FVB aholini dudburonlarni vaqti-vaqti bilan tozalashga, nosoz mo‘rilardan foydalanmaslikka chaqirmoqda.
Izoh (0)