Checheniston rahbari Ramzan Qodirovning Facebook’dagi sahifasi manziliga chiptalar qidirish bo‘yicha UAN servisi akkaunti joylashtirildi, deb yozadi Hi-Tech Mail.Ru. Endi sahifa “Sizning sayohatingiz — bizning tashvishimiz” deb nomlanadi.
Facebook.com/rkadyrov95 sahifasiga UAN birinchi postini 24-dekabr kuni joylashtirdi, unda servis Grozniydan Berlinga chiptalarni taklif qiladi. Sahifadagi keyingi postdan Seyshel orollariga sayohat reklamasi o‘rin olgan.
Eslatib o‘tamiz, 20-dekabr, chorshanba kuni AQSh rasmiylari inson huquqlari poymol etilishiga aloqador shaxslar o‘rin oladigan “Magnitskiy ro‘yxati”ga Checheniston rahbari Ramzan Qodirovni kiritgach, 23-dekabrga o‘tar kechasi uning Instagram va Facebook ijtimoiy tarmoqlaridagi sahifalari ishlashdan to‘xtadi.
Instagram va Facebook’dagi akkauntlari o‘chirib tashlangach, Checheniston rahbari Ramzan Qodirov boshqa ijtimoiy tarmoq — Mylistory’ga o‘tganini e’lon qildi.
Keyinroq Facebook kompaniyasi Checheniston Respublikasi rahbari Ramzan Qodirovning akkaunti bloklanishini uning AQSh sanksiyaviy ro‘yxatiga kiritilgani bilan izohladi.
Izoh (0)