Instagram’dagi akkaunti o‘chirib tashlangach, Checheniston rahbari Ramzan Qodirov boshqa ijtimoiy tarmoq — Mylistory’ga o‘tganini e’lon qildi, deb yozadi Meduza.
Uning so‘zlariga ko‘ra, ushbu ijtimoiy tarmoq “Chechenistonda sinov bosqichida turibdi va chet mamlakatlarnikidan kam emas”.
“Endi barcha muhim yangiliklarni foto va videolari bilan ushbu dasturga joylab boraman”, — deya ma’lum qildi Checheniston rahbari.
Xabarlarga ko‘ra, dastur Instagram’ning eski versiyasining ayni nusxasidir. Mylistory’da postlarni izohlash, do‘stlarni belgilash va shaxsiy xabarlarda maqolalar bilan bo‘lishish mumkin.
Eslatib o‘tamiz, 20-dekabr, chorshanba kuni AQSh rasmiylari inson huquqlari poymol etilishiga aloqador shaxslar o‘rin oladigan “Magnitskiy ro‘yxati”ga Checheniston rahbari Ramzan Qodirovni kiritgach, 23-dekabrga o‘tar kechasi uning Instagram ijtimoiy tarmog‘idagi sahifasi ishlashdan to‘xtadi.
