Shveysariyaning Jeneva aeroportida Ukraina sobiq bosh vaziri Arseniy Yatsenyuk to‘xtatildi. Bu haqda uning matbuot kotibi Olga Lappo ma’lum qildi, deya xabar beradi “Interfaks”.
“Jenevaga kichik qizi bilan uchib kelgan Arseniy Yatsenyuk pasport nazoratida Rossiya so‘roviga binoan (barchaga ma’lum Chechenistondagi jangovar harakatlarda ishtirok etganlik ayblovi bo‘yicha) to‘xtatildi. 10 daqiqa mobaynida barchasiga aniqlik kiritildi va qo‘yib yuborildi. Qayta parvoz chog‘i ham shunday jarayon qaytarilishi mumkinligi haqida ogohlantirgan holda”, — deya yozuv qoldirdi Lappo Facebook’dagi sahifasida.
Joriy yil aprelida Rossiya bosh prokuraturasi vakili Aleksandr Kurennoy Interpolga Arseniy Yatsenyukni xalqaro qidiruvga berish yuzasidan hujjatlar jo‘natilganini tasdiqlagandi.
Ma’lumot uchun, Yatsenyuk UNA-UNSO tashkiloti tarkibida 1990-yillarda Chechenistonda rossiyalik harbiy xizmatchilarga qarshi jangovar harakatlarda ishtirok etganligi to‘g‘risida 2015-yil sentabrida Rossiya Tergov qo‘mitasi rahbari Aleksandr Bastrikin ma’lum qilgandi.
Izoh (0)