FVV “Qamchiq” dovonida tun-u kun faoliyat ko‘rsatuvchi postlarni tashkil qildi

Favqulodda vaziyatlar vazirligi boshqa vazirlik va idoralar bilan hamkorlikda “Qamchiq” dovonida tun-u kun faoliyat ko‘rsatuvchi postlar tashkil qilingan bo‘lib, ushbu postlarda qutqaruvchilar, shifokorlar hamda YHXB xodimlari navbatchilik olib bormoqda. Bu haqda FVV axborot xizmati xabar bermoqda.

Mazkur chora-tadbirlar qishki mavsum kirib kelishi hamda ob-havoning yomonlashuvi oqibatida (tuman, kuchli shamol), avtomobil yo‘lida haydovchilarning xavfsizligi va sog‘lig‘iga ta’sir etishi mumkin bo‘lgan avariya va boshqa noxush holatlarning oldini olish maqsadida amalga oshirilmoqda.

Ushbu postlar quyidagi vazifalarni bajaradi:

• Avtotransport vositalari haydovchilari va ularning yo‘lovchilarini qabul qilish va ularning hayot faoliyati uchun zarur bo‘lgan sharoitni ta’minlash.
• Zarur bo‘lgan ma’lumotlarni taqdim etish va shifokor yordamini ta’minlash.
• Avtotransport vositalarini kichik hajmdagi ta’mirlash ishlarini amalga oshirish uchun sharoit yaratish yoki avtoulovni yaqin atrofdagi ta’mirlash ustaxonalariga yetkazib qo‘yish.