“Ipak yo‘li” AITB boshqarmasi bosh maslahatchisi janob Xyugo Minderxaud O‘zbekistonda 22 yildan buyon istiqomat qiladi va o‘zini anchadan buyon bu yerda “suvdagi baliq”dek his qiladi — rus tilida bemalol so‘zlasha oladi, o‘z oilasini, do‘stlarini va milliy oshxonani yaxshi ko‘radi, ikkinchi vatani iqtisodiyotining rivojlanishi yo‘lida faol hamda maqsadli harakat qilib kelmoqda.
Xyugo Minderxaud “Daryo” nashriga intervyu berdi.
“Daryo”: Janob Minderxaud, iltimos, O‘zbekistonga qanday qilib kelib qolganingiz tarixini so‘zlab bersangiz.
Xyugo Minderxaud: Men O‘zbekistonga bundan 22 yil oldin, 1995-yilda kelgan edim. Kelishimdan maqsad Niderlandiyani ABN AMRO bankining Toshkentda shu’ba korxonasini yaratish edi.
Men ABN AMRO Bank O‘zbekiston MB, H. J. bankida 11 yil ishladim va 2006-yilda menga Amsterdamga qaytish taklifini bildirishdi. Men buni xohlamasdim! (kuladi) Men shu yerda qolib, mustaqil iqtisodchi konsultant sifatida ishlab ko‘rishga qaror qildim. 2006-yildan 2010-yilga qadar O‘zbekistonda va MDHning boshqa mamlakatlarida, Qozog‘iston va Afg‘onistonda ko‘plab loyihalar ustida ish olib bordim; Armaniston, Qirg‘iziston va boshqa davlatlarning mustaqil banklari direktori lavozimida faoliyat yuritdim.
2010-yilda maqsadi Osiyo taraqqiyot banki sarmoyasini jalb etish bo‘lgan “Ipak yo‘li” banki boshqarmasining bosh maslahatchisi lavozimida ish boshladim; men go‘yoki G‘arb va Sharq orasida “ko‘prik” vazifasini bajardim. Bu mening bankka kelgunimdan ancha oldin boshlagan uzoq jarayon edi. Maqsadga 2013-yilda erishildi. Hozirda mening faoliyatimni asosiy qismi “Ipak yo‘li” bankining xalqaro moliyaviy institutlar bilan munosabatlarni rivojlantirishga qaratilgan.
“Daryo”: Sizning bizni mamlakatimizga tashrifingiz davrida O‘zbekistonda qanday o‘zgarishlar amalga oshirildi?
Xyugo Minderxaud: Aytish mumkin-ki, 1995-yilda O‘zbekistonga kelganimda mamlakat birinchi bor dunyoga “ochilgan” edi. Bu juda ajoyib va qiziqarli vaqtlar bo‘lib, yangi kompaniyalar hamda sarmoyadorlar uchun qulay sharoitlar yaratila boshlangan edi. Bugungi kunda mamlakat iqtisodiyotining rivoji yo‘lida “ikkinchi nafas” ochilganidan xursandman.
O‘zgarishlar juda katta! Masalan, men birinchi bor bu yerga kelganimda ikki hafta “O‘zbekiston” mehmonxonasida yashaganman… Bunga sabab — boshqa mehmonxonalar deyarli yo‘q edi (kuladi). Hozirda esa Toshkentdagi mehmonxonalarni qarang! Bu kabi o‘sishni barcha sohalarda kuzatish mumkin!
“Daryo”: “Ipak yo‘li” AITB tarixida ro‘y bergan ahamiyatli hodisalardan biri — 2013-yilda Osiyo taraqqiyot bankining aksiyadorlari tarkibiga qo‘shilishi. Fikringizcha, bu davr mobaynida bankda yana qanday ko‘zga ko‘rinarli o‘zgarishlar sodir bo‘ldi?
Xyugo Minderxaud: “Ipak yo‘li” banki doimo yaxshi obro‘ga ega bo‘lgan, biroq OTBning aksiyadorlar qatoriga qo‘shilishi bank tarixidagi salmoqli hodisa hisoblanadi! Osiyo taraqqiyot banki barqarorlik va ishonch garovi. “Ipak yo‘li” banki bilan hamkorlikka qiziqish bildirgan xalqaro moliyaviy institutlar bilan munosabatlar sezilarli darajada o‘sdi. Bank uchun yangi imkoniyatlar va istiqbollar ochildi. 2016-yilda bankka Niderlandiya taraqqiyot banki FMO, Germaniya taraqqiyot va investitsiya banki DEG hamda Niderlandiyaning Triodos Bank N.V. tomonidan birinchi bor sinditsiyalashgan kreditlar ajratildi, yangi loyihalarni amalga oshirish yo‘lida yirik banklar va moliyaviy institutlar bilan muzokaralar olib borildi. Endilikda ko‘plab xalqaro moliyaviy institutlar O‘zbekistondagi “Ipak yo‘li” banki bilan hamkorlik qilishni xohlamoqda.
“Daryo”: “Ipak yo‘li” AITB innovatsion bank hisoblanadi. U bank sohasiga qanday innovatsiyalarni olib kirdi?
Xyugo Minderxaud: “Ipak yo‘li” banki rostdan ham innovatsion hisoblanadi, ayniqsa, IT-texnologiyalarda. Biz birinchi bor O‘zbekiston bozorida UnionPay International kartalarini joriy etdik, Visa International kartalariga xizmat ko‘rsatgan birinchi banklar qatorida turdik, shuningdek, O‘zbekistondagi ushbu xalqaro to‘lov tizimlarining asosiy a’zolari va protsessing markazlarimiz. Yangi karta mahsulotlarini chiqarishni davom ettirmoqdamiz. “Ipak yo‘li” banki PayWave, 3D-Secure va boshqa shu kabi barcha zamonaviy texnologiyalarga ega va hozircha respublikadagi yagona hisoblanadi. Bundan tashqari, “Ipak yo‘li” banki o‘z mijozlariga shaxsiy kabinetdan foydalangan holda to‘liq onlayn xizmatlar paketini boshqarish va Ipak Yuli Mobile mobil dasturini taqdim etdi. Aytgancha, bankning yana bir innovatsiyalaridan biri — bu menman! (kuladi) O‘ylashimcha, men tijorat bankining birinchi xorijlik konsultantiman, 2010-yilda bu kabi konsultant faqatgina “Ipak yo‘li” bankida mavjud edi.
“Daryo”: Yaqin besh yil ichida “Ipak yo‘li” AITBning qanday istiqbolli kelajak kutmoqda?
Xyugo Minderxaud: Bizning rejalarimiz bisyor! Asosiy e’tiborni bankning chakana biznesini rivojlantirishga qaratmoqchimiz. Qishloq xo‘jaligi sohasining yangi tarmoqlarini yaratish ustida ishlar olib borilmoqda, GRJ va ETTB bilan muqobil energiya borasidagi loyihalarni rivojlantirish bo‘yicha muzokaralar ketmoqda. Bu O‘zbekiston uchun muhim yo‘nalish. Shuningdek, mamlakatning rivojlanishida muhim hisoblanuvchi mikroiqtisodiyotni o‘stirish hamda Osiyo taraqqiyot banki loyihalarida ishtirok etish uchun ko‘plab rejalarni maqsad qilib qo‘yganmiz. Shunday ekan, hali oldinda amalga oshirishimiz lozim bo‘lgan ishlar juda ko‘p!
“Daryo”: Yaqinlashib kelayotgan O‘zbekiston Respublikasi Konstitutsiyasi kuni munosabati bilan “Ipak yo‘li” AITBning mijozlari va hamkorlariga qanday tilaklarni yo‘llaysiz?
Xyugo Minderxaud: Bu ulkan bayram! Shu sababli men hamkorlarimizga, bank mijozlariga va O‘zbekistonning barcha aholisiga birinchi navbatda — sog‘lik, omad va farovon hayot tilab qolaman! Tez kunlarda yangi yil kirib keladi, shu sababli (o‘zbek tilida) “Yangi yilingiz bilan!”.
Reklama huquqi asosida.
Izoh (0)