Noma’lum shaxslar 27-noyabr, dushanba kuni Burkina-Faso poytaxti Uagaduguda Fransiya prezidenti Emmanuel Makronning tashrifiga ikki soat qolganida fransuz harbiylariga hujum uyushtirdi. Bu haqda Agence France Presse’ga tayanib, “TASS” xabar berdi.
Ma’lumotlarga ko‘ra, hujum uyushtirganlar soat 20:00 da mototsiklda fransuz avtomobillariga yaqinlashgan va ularga granata otgan. Granata “nishon”ga yetib bormagan, ammo uning portlashi oqibatida uch nafar mahalliy aholi jarohat olgan. Fransiya prezidenti Uagaduguga soat 22:30 da yetib kelgan.
Fransuz harbiylari mintaqada 2014-yilning yozidan buyon, G‘arbiy Afrikaning beshta mamlakati — Burkina-Faso, Mavritaniya, Mali, Niger va Chad hukumatlari bilan hamkorlikdagi “Barxan” operatsiyasi sabab bo‘lib turibdi. Ularning maqsadi Liviyadan Gvineya-Bisaugacha bo‘lgan minataqadagi jangarilar guruhiga qarshi kurashishdan iborat.
Avvalroq, Fransiya prezidenti Burkina-Fasoga Yevropa Ittifoqining Afrika bilan munosabatlarini mustahkamlash maqsadida tashrif buyurishini ma’lum qilgandi.
Izoh (0)