15-noyabr kuni Toshkent shahridagi International Hotel Tashkent mehmonxonasida Qoraqalpogʻiston Respublikasida oʻtkazilgan ijtimoiy-iqtisodiy va ekologik tadqiqotning asosiy natijalari taqdimoti oʻtkazildi hamda Birlashgan Millatlar Tashkiloti (BMT) doirasida Orolboʻyi mintaqasi uchun inson xavfsizligi boʻyicha koʻpsheriklik fondini tashkil etish yuzasidan takliflar muhokama etildi. Bu haqda BMTning Oʻzbekistondagi vakolatxonasi axborot xizmati xabar bermoqda.
Tadbir BMTning Oʻzbekistondagi vakolatxonasi hamda Oʻzbekiston Respublikasi Iqtisodiyot vazirligi tomonidan Orol dengizi inqirozi oqibatlaridan zarar koʻrgan aholining turmush sharoiti salohiyatini mustahkamlash boʻyicha BMTning qoʻshma dasturi doirasida tashkil etildi. Tadbirda aloqador vazirlik va idoralar, diplomatik missiyalar, xalqaro tashkilotlar va moliya institutlari vakillari ishtirok etdi.
Joriy yilning avgust oyida Qoraqalpogʻiston Respublikasining Orol dengizi inqirozi oqibatida eng koʻp zarar koʻrgan 8 ta tumanida tadqiqot oʻtkazilib, u mazkur tumanlardagi mavjud barcha 116 mahalladagi 1600 uy xoʻjaliklari qamrab olindi.
Shuningdek, har bir tumanda, tegishli vazirlik va idoralar, korxona va tashkilotlar vakillari, fermerlar, fuqarolarning oʻzini-oʻzi boshqarish organlari va fuqarolik jamiyati vakillari ishtirokida suhbatlar va muhokamalar tashkil etildi.
Ijtimoiy tadqiqot ijtimoiy infratuzilmalar holatini, ijtimoiy ahamiyatga ega asosiy xizmat turlarining mavjudligi va sifat darajasini baholash orqali uy xoʻjaliklarining farovonligi toʻgʻrisida toʻliq ma’lumot olish imkonini berdi.
Mazkur tadqiqot natijalari oʻrganilgan hududlarni ijtimoiy-iqtisodiy rivojlantirish boʻyicha qoʻshimcha chora-tadbirlarni ishlab chiqishda amaliy ahamiyatga ega boʻlib, shuningdek, BMT homiyligida Orolboʻyi mintaqasi uchun inson xavfsizligi boʻyicha koʻpsheriklik fondini tashkil etish uchun dastur strategiyasini ishlab chiqish uchun asos boʻlib xizmat qiladi. Fondning faoliyati, birinchi navbatda, loyihalar faoliyatini muvofiqlashtirishning samarali mexanizmini ishlab chiqish, shuningdek, 2017—2021-yillarda Orolboʻyi mintaqasini rivojlantirish davlat dasturini amalga oshirishga koʻmaklashish doirasida xalqaro hamkor tashkilotlarning moliyaviy resurslarini keng jalb etishga qaratiladi.
Izoh (0)