Amerikaning Boston shahridagi RR Auction kimoshdi savdo uyida AQShning 35-prezidenti Jon Kennediga nisbatan suiqasd uyushtirgan Li Xarvi Osvaldning qotili — Jeki Rubining qo‘lyozmasi sotuvga qo‘yildi, deb xabar berdi “RBK”.
Lotning dastlabki qiymati 12 ming dollarga baholanmoqda. Ushbu 24 varaqli qo‘lyozmani Rubi qamoqda, o‘z o‘limini kutib yotganida qalam bilan yozgan. Rubi o‘z qoralamalarida nima sababdan bu ishni amalga oshirganini va u Osvaldni qasddan o‘ldirmaganini ta’kidlagan.
Rubi Dallasdagi tungi klublardan biriga egalik qilgan. 1963-yilning 24-noyabrida, Kennedi o‘ldirilganidan ikki kun o‘tib, Rubi huquq-tartibot xodimlari Osvaldni politsiya mahkamasidan olib chiqishini kutgan va unga qarata o‘q uzgan. Erkak hibsga olingan va o‘lim jazosiga hukm etilgan, biroq keyinroq hukm bekor qilingan. Rubi qayta bo‘lib o‘tadigan sudga qadar yashamagan, u o‘pka saratoni sabab 1967-yilda vafot etgan.
Izoh (0)