Millionerlarni boshqalardan nafaqat bank hisoblaridagi yirik summalar, balki butunlay o‘ziga xos dunyoqarash ham ajratib turadi, deb yozadi InsiderPro.
Millioner Stiv Sibold 26 yil davomida badavlat kishilarning odatlari va xulq-atvori haqida ma’lumotlar to‘pladi. Bu vaqt davomida u ko‘plab multimillionerlar va milliarderlar bilan uchrashib, suhbatlashdi. O‘z xulosalarini “Boylar qanday fikrlaydi?” kitobida bayon qildi.
Sibold aniqlagan eng muhim narsa — boylik siri pul topish mexanizmida emas, badavlat kishilarni boshqalardan ajratib turuvchi fikrlash tarzida. Quyida asosiy sakkizta farq bilan tanishishingiz mumkin.
- Boylar pullar ularning huquqi deb hisoblaydi
Sibold shunday yozadi: “Dunyo miqyosida fikrlovchilar kapitalistik mamlakatlarda jamiyatga katta foyda keltirayotgan bo‘lsa, badavlat bo‘lish huquqiga ega ekanligini biladi”.
Oddiy odamlar faqat omadli kishilar boy bo‘lishi mumkin deb hisoblaydi. Fikrlashdagi bu farq ularni lotereya o‘ynashga majbur qiladi, istiqbolli boylarni esa — ishlashga.
- Boylar shaxsiy biznes — boylik to‘plashning eng tezkor usuli ekanligini biladi
“Haqiqat shundaki, doimiy ish shaxsiy biznesdan xavfsizroq emas. Birinchi qarashda bu mantiqqa ziddek tuyulsa-da, o‘ziga ishlovchi odamlar qo‘shimcha mablag‘ manbalarini qidirish va daromadini o‘z xohishiga ko‘ra oshirish imkoniyatiga ega”, — deb yozadi Sibold.
Albatta, o‘z ishini yo‘lga qo‘yish ma’lum bir xavflar bilan bog‘liq, biroq millionerlar bu xavf o‘z salohiyatini namoyon etishdan xavfliroq ekanligini biladi.
“Ko‘pchilik kishilar uncha katta bo‘lmagan maosh to‘lanadigan ishda qolib, doimiy muhtojlikdagi hayotini kafolatlaydi”, — qo‘shimcha qiladi Sibold.
- Badavlat kishilar topqirlik muvaffaqiyat kaliti ekanligini tushunadi
Sibold shunday yozadi: “Maktabdagi besh baholar boylik kaliti bo‘lganda edi, kollejni a’loga tamomlagan har bir bitiruvchi millionerga aylanardi. Biroq boylik ma’lumotlarni eslab qolish va imtihonlarni muvaffaqiyatli topshirish qobiliyatiga emas, sog‘lom fikrlashga bog‘liq”.
Ziyraklikni qanday shakllantirish mumkin? Badavlat insonlar qanday fikrlashi va pullarni qanday ishlatishini bilishga harakat qiling.
- Boylar jamoa bo‘lib ishlashga ishonadi
“Millionerlar hayotda ishonchli jamoa zarurligini yaxshi biladi va g‘oya va rejalarini hayotga tatbiq etishga yordam berishga qodir iqtidorli kishilarni qidirishga asosiy e’tiborini qaratadi. Buyuk imkoniyatlar kishilarning birgalikdagi aqliy va jismoniy harakatlari tufayli yaratiladi”, — deb yozadi Sibold.
- Boylar pul topish juda oson ekanligini biladi
“Odamlar doim badavlat insonlar aqlliroq, yaxshiroq ta’lim olgan va omadliroq deb hisoblaydi. Bu albatta yanglish fikr”, — deb yozadi Sibold.
Boylar pullar g‘oyalar va muammolar yechimidan kelishini tushunadi. Yechim qanchalik muvaffaqiyatli bo‘lsa, mukofot ham shunchalik yuqori bo‘ladi. Millionerlarning o‘ziga xos hech qanday siri yo‘q. Odamlarning ko‘pchiligiga ularni cheklovchi maslaklari xalaqit beradi.
- Badavlat kishilar boyib ketish uchun o‘ylash kerakligini tushunadi
Sibold o‘rta sinf daromadni oshirishning yagona yo‘li ko‘proq ishlash degan fikrda ekanligini tushuntiradi. U shunday yozadi: “Dunyoda ijodiy fikrlash eng ko‘p qadrlanadi. Ko‘proq pul topish uchun aqlingizni murakkab muammolar yechimini izlashga charxlang”.
- Boylar pullar — bu erkinlik deb hisoblaydi
“Badavlat kishilar pullarga ular va oila a’zolarining imkoniyatlari chegarasini kengaytiruvchi yaratuvchi vosita sifatida qaraydi”, — deb hisoblaydi Sibold.
Ulardan farqli ravishda oddiy odamlar pullarni “zulm vositasi” deb hisoblaydi. Boylar uchun pullar cheksiz imkoniyatlar ochuvchi resurs. Kambag‘allar esa ularning muhimligini rad etadi. Bunday munosabat bilan ularning kambag‘al ekanligi hayratlanarli emas.
- Badavlat insonlar o‘zini ifodalash uchun ishlaydi
Sibold shunday deydi: “Millionerlar faqat pul uchun ishlash — boylik yaratish yo‘lidagi eng yomon strategiya ekanligini yaxshi biladi”.
U eng yuqori maoshli ish emas, ijodiy imkoniyatlari katta bo‘lgan mashg‘ulot qidirishni tavsiya qiladi. Bunday mashg‘ulotni topganingizda o‘z sohangizning eng yaxshi mutaxassisi bo‘lish uchun chin dildan kirishing. Buning evaziga noodatiy boylik bilan mukofotlanasiz.
Izoh (0)