Namangan shahridagi chorrahalarga o‘rnatilgan yo‘l harakati qoidalari buzilishini qayd etuvchi videokuzatuv kameralari 2017-yil 1-noyabrdan rasman faoliyatini boshlaydi. Bu haqda “Daryo”ga Namangan viloyat IIB matbuot xizmati ma’lum qildi.
“Xavfsiz shahar” konsepsiyasi asosida shahar hududidagi 6 ta — Islom Karimov nomli ko‘chada 2 ta (G‘irvonsoy ko‘chasi va Oromgoh ko‘chasi bilan kesishgan chorrahalar), Alisher Navoiy nomli ko‘chada 3 ta (Qo‘qon, Marg‘ilon va Uychi ko‘chalari bilan kesishgan chorrahalar) hamda Sanoatchi va Sohilbo‘yi ko‘chalari kesishmasidagi chorrahaga avtomatlashtirilgan zamonaviy video va foto qayd etish vositlari o‘rnatildi.
Endi mazkur kameralar jamoat tartibini saqlash, sodir etilgan jinoyatlarni fosh etishda qo‘llanilishi bilan birga, chorrahalarda svetofor ishoralari, bo‘laklarga ajratuvchi va to‘xtash chiziqlari, tezlik me’yorlariga amal qilmaslik, transport oqimiga qarama-qarshi harakatlanish va avariya holatlarini keltirib chiqarish kabi yo‘l harakati qoidabuzarliklarini aniqlaydi.
Qoidabuzarliklar yuzasidan chora ko‘rish ishlarini tashkil etish maqsadida “ma’muriy amaliyot” elektron tizimi tashkil etiladi. Ushbu tizimda qoidabuzarlik to‘g‘risida ma’muriy bayonnoma rasmiylashtirilmasdan jarima solish to‘g‘risidagi qaror materiallar ilova qilingan holda pochta orqali transport vositasi egasining yashash manziliga yuboriladi.
Jarimani bu haqdagi qaror chiqarilgan sanadan boshlab 60 kun mobaynida to‘lash lozim. Jarima muddatida to‘lanmagan taqdirda transport vositasi vaqtinchalik jarima maydoniga tortiladi.
Izoh (0)