O‘zbekiston Respublikasi Prezidenti Shavkat Mirziyoyev 28-oktabr kuni Tashkent City xalqaro biznes markazining loyihasi bilan tanishdi, deb xabar berdi O‘zA.
Shavkat Mirziyoyev qurilish uchastkasida ushbu zamonaviy markaz loyihalari va rejalari bilan tanishdi. Buyurtmachi va quruvchilar oldida turgan vazifalar, tashkiliy va moliyaviy masalalarni joyida muhokama qildi. Loyihalarni takomillashtirish, qurilishni tezlashtirish bo‘yicha topshiriqlar berdi.
Mazkur zamonaviy kompleks Toshkentning Alisher Navoiy, Olmazor, Islom Karimov va Furqat ko‘chalari oralig‘idagi 80 gektar hududda barpo etiladi. Loyihaga muvofiq Tashkent City’da biznes markazlar, savdo majmualari, mehmonxonalar, ofislar, kongress-xol, ko‘rgazma zallari, ko‘p qavatli zamonaviy uylar, restoranlar, sun’iy ko‘l, favvoralar, ijtimoiy va boshqa obyektlar quriladi.
Bu haqda 2017-yil 28-iyul kuni O‘zbekiston Respublikasi Vazirlar Mahkamasining “Toshkent shahrining markaziy qismini obodonlashtirish va arxitekturaviy qiyofasini yanada yaxshilash hamda aholi va poytaxt mehmonlari uchun zarur shart-sharoitlar yaratish chora-tadbirlari to‘g‘risida”gi qarori qabul qilingan. Mazkur hujjat asosida Vazirlar Mahkamasi huzurida Tashkent City xalqaro biznes markazi hududidagi obyektlarni qurish va ekspluatatsiya qilish bo‘yicha direksiya tuzilgan.
Hozirgi kunda hududni qurilishga tayyorlash ishlari amalga oshirilmoqda. Markazni loyihalashtirish va qurishga O‘zbekiston va xorijiy davlatlarning yetakchi loyiha institutlari, chet ellik investorlar jalb etilmoqda.
Izoh (0)