“Carzone.uz” nashri arzon avtomobilni afzal ko‘ruvchi dunyoning eng badavlat kishilari haqida maqola chop etdi.
Uorren Baffet — Cadillac XTS
Mashinasining narxi, taxminan, 45 ming dollar
Cadillac avtomobilini jo‘n deb bo‘lmaydi, albatta. Ammo 77,3 mlrd dollari bor amerikalik bunaqa mashina minishi g‘ayrioddiy hol. Shunga qaramasdan Baffet Cadillac XTS’da yurishi bor gap. Uning sedani 2014 yilda ishlab chiqarilgan. Milliarder “Kadillak”ni yoqtirsa kerak – bundan oldingi mashinasi ham Cadillac DTS (2006) edi.
Aftidan, Baffet juda ko‘p yurgani uchun bu avtomobilni tanlagan. U shaxsiy avtomobilida bir yilda o‘rtacha 5600 km yo‘l bosib qo‘yadi.
Mark Sukerberg - Acura TSX
Mashinasining narxi, taxminan, 30 ming dollar
Facebook asoschisi va dunyo boylarining beshinchisi kamtarona turmushi bilan butun dunyoda mashhur. Masalan, GQ jurnali Sukerbergni Kremniy vodiysining eng didsiz kiyinuvchi fuqarosi, deb atagan. Chunki Mark qalpoqli keng ko‘ylak va futbolka kiyib yuradi. Avtomobil tanlashda ham yuksak didi bilan ajralib turmaydi.
CNBC kanalining xabariga ko‘ra, Sukerberg 2014-yilda ishlab chiqarishi to‘xtatilgan Acura TSX’da yuradi. Milliarder bu mashinani “xavfsiz, qulay va dabdabadan xoliligi” uchun tanlagan ekan. Boy Sukerberg bitta avtomobil bilan kifoyalanib qolmagan, unda Volkswagen Golf GTI ham bor. Ikkala mashinasining narxi deyarli bir xil. Xullas, Facebook asoschisining garaji o‘rtamiyona amerikalikning garajidan farq qilmaydi.
Elis Uolton — Ford F-150
Mashinasining narxi, taxminan, 40 ming dollar
Elis Uoltonni ko‘pchilik tanimaydi. Wal-Mart savdo saltanatining asoschisi, 80-yillarda Amerikaning eng boy kishisi Sem Uolton vafotidan keyin uning boyligi qizi Elisga qolgan. Elis Luiza Uoltonning boyligi 40,8 milliard dollarga baholanadi, ammo milliarder xonim kamtarga kamol aqidasiga amal qiladiganlardan.
Uning shaxsiy avtomobili 2006-yilga mansub Ford F-150 pikapidir. Ranchosi ham arzigulik deb bo‘lmaydi. Uning otasi ham 1979-yildan boshlab Ford F-150da yurgan.
Stiven Balmer — Ford Fusion Hybrid
Mashinasining narxi, taxminan, 28 ming dollar
Microsoft’ning sobiq bosh direktori va hozir basketbol jamoasining egasi Stiven Balmer sayyoraning boylari ro‘yxatida 21-o‘rinni egallaydi. Uning boyligi 30 milliard dollar atrofida. Balmer Ford avtomobillarining muxlisi, chunki uning otasi bu kompaniyada menejer bo‘lib ishlagan.
2009-yilda Ford kompaniyasi unga o‘rtacha o‘lchamdagi Ford Fusion gibrid sedanini rasman hadya qilgan. Bu Ford’larning eng qimmati bo‘lmasa ham Balmerga yoqqan. Ehtimol, milliarderning boshqa mashinasi ham bordir, biroq u hamisha Fusion Hybrid’da yuradi.
Ingvar Kamprad — Volvo 240 GL
Mashinasining narxi, taxminan, 22 ming dollar
IKEA savdo kompaniyasining egasi Ingvar Kamprad o‘z vatani Shvetsiyaga qaytdi. Bungacha u 20 yilcha Shveysariyada yashadi. Uning sevimli avtomobillaridan biri 1993-yilda chiqarilgan Volvo 240 GL edi. Kampradning kamtarligini top-menejerlarning ijtimoiy axloq mas’uliyatiga misol qilib keltirish mumkin.
IKEA asoschisida ilgari Porsche ham bo‘lgan, ammo hozir minmaydi. U rulga o‘tirmay qo‘ygan, chunki 91 yoshida mashina minish uchun juda xavfli.
Izoh (0)