Qirg‘iziston Jokorgu Keneshi deputati Almazbek Toktorov qirg‘izistonlik zobit Qozog‘iston chegarasini kesib o‘tish chog‘ida narkotiklar bilan qo‘lga tushishini shubhali hisobladi. Bu haqda u 18-oktabr, chorshanba kuni parlament yig‘ilishida ma’lum qildi, deya xabar beradi “Akipress”.
“Bosh shtab zobiti Qozog‘istonda narkotiklar bilan qo‘lga tushgani haqida xabar tarqalganiga ikki kun bo‘ldi. Unda davlat sirlari bilan tanishishga ruxsat bo‘lgan yoki yo‘qligini surishtirib o‘tirmayman, biroq qirg‘iz tomoni qanday choralar ko‘ryapti? Uning narkotiklar bilan qo‘lga olingani juda shubhali. Nega shu paytgacha bunga munosabat yo‘q? U xalqaro mashg‘ulotlarga yo‘l olgandi, bunda chegaradan o‘tish jarayoni qanday tashkil etilgan? Ularda immunitet yoki davlatlararo kelishuv bo‘lmaganmi?” — o‘smoqchiladi deputat.
Yig‘ilishda ishtirok etgan Qirg‘iziston milliy xavfsizlik qo‘mitasi raisining o‘rinbosari Rustam Mamasodiqov Bosh shtab o‘z tekshruvini o‘tkazayotganini ma’lum qildi.
“Ha, chindan ham zobit mashg‘ulotlarga yuborilgandi. Hozir Bosh shtab hodisa tafsilotlarini o‘rganmoqda, ularning natijasi bo‘yicha o‘z javobini beradi”, — deya izoh berdi u.
Izoh (0)