Ijtimoiy tarmoqlarda O‘zbekistonda xizmat ko‘rsatgan artist Xosiyat Husanovaning qo‘shnilari bilan janjali aks etgan videolar tarqalgan edi. Xosiyat Husanova ushbu janjalning kelib chiqish sabablari, ayni vaqtda qo‘shnilari bilan munosabatiga oydinlik kiritdi. Aktrisa bu haqda jurnalist Feruz Muhammadga bergan intervyusida ma’lum qildi.
Qo‘shnilarimiz tozalikka rioya qilmagani jabridan mahallamizda chiqindi uyulib qolgan. Yetti yildan buyon chiqindi tashish bilan kunim o‘tadi. Charchab ketdim, “Сhiqindilaringni ol!” desam, men bilan janjallashib ketishyapti.“Sayyor kamera” ko‘rsatuvini chaqiray desam, mahallamning obro‘sini o‘zim to‘kamanmi deyman, istihola qilaman. Aslida “Sayyor kamera”ga berib yuboradigan joy. Mashina-mashina chiqindi tashiyverib charchadim.
“Hayvonga o‘xshab yashayverasanmi, it ham o‘tirgan joyini dumi bilan supurib o‘tiradi-ku”, dedim. Qo‘shnim videoga olib turdi. “Jinnimanmi chiqindi tozalab!”, deganidan keyin: “Seni chiqindingni tozalab men jinnimanmi!”, dedim. “Videolaringni internetda tarqatib, sharmanda qilaman”, dedi. “Qayerda tarqatsang tarqat, keyin men chora ko‘raman”, dedim. Ochiqchasiga videoga olib turdi va keyin o‘sha videolarni tarqatdi.
Qo‘shnim: “Xosiyat Husanova millatchilik qilayapti”, deb bu gap-so‘zlarni boshqa tomonga buribdi. Menga: “Sen yaqinda ko‘chib kelib, mahallaga xo‘jayin bo‘lib qoldingmi? Seni mahalladan yo‘q qilaman!”, degan edi. “Men O‘zbekiston fuqarosiman, O‘zbekistonning xohlagan joyida yashayman! Xohlasang, sen ket”, dedim. “Bizning qonun-qoidamizga amal qilmasang, sen ketasan! Chiqindingni olmasang, seni sudga beraman”, dedim.
Videolarni internetga chiqarmasa, biror nima demoqchi emasdim. Ammo internetga chiqarib yuborgandan so‘ng, profilaktika noziriga borib: “Chiqindingni tozala desam, bular o‘sha video bilan boshqacha targ‘ibot olib boryapti, bularga chora ko‘ringlar”, deb yozib berdim.
Ertasi kuni, kimdir o‘rgatgan shekilli, mardikor olib kelib, bir mashina chiqindini yo‘q qilishdi. Yana olti qopcha chiqindi turibdi. Bu chiqindilarni bolalar sochib o‘ynashmoqda, uni esa yana men tozalayman. Mahalla inspektori: “Oylab-yillab bir-biringiz bilan janjallashib yurasizlarmi, yarashinglar endi”, deb maslahat berdi.
Mahalla tizza bo‘yi loy edi, besh mashina shag‘al, uch mashina tuproq to‘kdim. Asfalt yotqizdim, “Shuncha qilgan ishimga rahmatlaring shumi?”, dedim. Endi ko‘chaga videokamera ham qo‘yaman. Kim ko‘chaga chiqindi tashlasa, sudga beraman. Shuncha yil qo‘shnichilik deb indamay keldim, endi har narsani qonuniy hal qilaman.
Xosiyat Husanova, O‘zbekistonda xizmat ko‘rsatgan artist
Izoh (0)