Bugun, 25-sentabrdan O‘zbekiston Respublikasi Qonun hujjatlari ma’lumotlari milliy bazasi “Lex.uz” normativ-huquqiy hujjatlar e’lon qilinadigan rasmiy manba maqomiga ega bo‘ldi. Bu haqda O‘zA xabar bermoqda.
Bu Prezident Shavkat Mirziyoyevning joriy yil 8-fevraldagi “Qonun hujjatlarini tarqatish tizimini tubdan takomillashtirish chora-tadbirlari to‘g‘risida”gi qarorida belgilangan.
Qabul qilingan normativ-huquqiy hujjatlarning, ularga kiritilgan o‘zgartish va qo‘shimchalarning mohiyati va ahamiyatini ijrochilarga va aholiga o‘z vaqtida yetkazish maqsadida hujjat qabul qilingan kuniyoq bosma va elektron ommaviy axborot vositalarida e’lon qilinmoqda.
Hozirda aholi o‘rtasida keng tarqalgan Telegram messenjerida ham “Lex.uz”ning rasmiy kanali ish boshladi. Unda yangi qabul qilingan normativ-huquqiy hujjatlarni avtomat ravishda yetkazish bo‘yicha maxsus kanal ishga tushirildi.
Facebook ijtimoiy tarmog‘ida “Adliya bilan muloqot” guruhi ham tashkil etildi. Bu guruhda normativ-huquqiy hujjatlar bo‘yicha tushuntirish, ushbu masalalar bo‘yicha savollarga Adliya vazirligi mutaxassislari tomonidan javob berilmoqda.
Izoh (0)