BMT Xavfsizlik kengashida veto huquqining cheklash haqidagi da’vatni 114 ta davlat ma’qulladi

Parij va Mexikoning genotsid hamda boshqa keng ko‘lamli jinoyatlarga qarshi harakatlarni ko‘rib chiqishda BMT Xavfsizlik kengashi doimiy a’zolari tomonidan veto qo‘llash huquqidan ixtiyoriy voz kechishlari bo‘yicha tashabbusini 114 ta davlat qo‘lladi. Bu haqda “RIA Novosti” xabar beradi.

Fransiya davlat kotibi Jan-Batist Lemuan 100 dan ortiq davlat veto huquqini cheklashni qo‘llayotganiga munosabat bildirar ekan, “bu BMTga a’zo davlatlarning yarmidan oshig‘i uning qanchalik samarali ekanligini tushunishlarini anglatishi”ni aytdi.

“Bildirilayotgan taklif o‘ta dolzab, chunki Suriyadagi urush davomida biz ko‘rganlarga o‘xshash yangi fojialarga duch kelmasligimizga kafolat yo‘q”, — deb Fransiya davlat kotibining so‘zlaridan keltiradi “TASS”.

Davlat kotibiga ko‘ra, Fransiya ishtirokida Suriyadagi vaziyatga taalluqli bir necha rezolyutsiya Xavfsizlik kengashida ovozga qo‘yilgan, biroq Rossiya va Xitoy tomonidan “vetolar turkumi” tufayli barchasi chippakka chiqqandi.