18 ming atrofida avtomobil raqamlari sotuvga qo‘yildi. Dastlabki hisob-kitoblarga qaraganda, barcha “chiroyli” raqamlarning sotilishidan keladigan daromad 380 milliard so‘mni tashkil etadi, deb xabar beradi “Novosti Uzbekistana”.
Onlayn-sotuv yo‘li bilan realizatsiya qilinadigan avtomobil raqamlarining narxi nafaqat kategoriyaga, balki mintaqaga ham bog‘liq bo‘ladi. Toshkent shahar IIBB matbuot xizmati rahbari Akmal Yunusovning so‘zlariga qaraganda, loyihani tayyorlashda Vazirlar Mahkamasi xalqaro tajribani o‘rgangan, shuningdek, talabni tahlil qilgan.
“Onlayn-auksionni boshlashdan oldin biz mamlakatning barcha mintaqalarida xarid qobiliyatini o‘rganib chiqdik. Shuningdek, xalqaro tajriba, qo‘shni davlatlar tajribasini o‘rgandik. Natijada Toshkentdagi xarid qobiliyati mintaqada to‘lanadigan puldan farq qilishi aniqlandi”, — ma’lum qildi Yunusov.
Shu munosabat bilan poytaxt, Qoraqalpog‘iston va viloyatlar uchun har xil narxlar belgilashga qaror qilindi.
Ayni paytda sotuvga uch kategoriyadagi 400 ga yaqin avtoraqam qo‘yilgan. Toshkentdagi “chiroyli” raqam uchun boshlang‘ich narx — 7488750 so‘m, Qoraqalpog‘iston, Toshkent viloyati va boshqa viloyatlar uchun — 5242125 so‘m.
Avtoraqamlar realizatsiyasi summasining 80 foizi respublika budjetiga, 20 foizi — IIV xodimlarini ijtimoiy qo‘llab-quvvatlash, IIV moddiy-texnik bazasini rivojlantirish va boshqa xarajatlar maxsus jamg‘armasiga yo‘naltiriladi.
Izoh (0)