AQSh Kongressining Vakillar palatasi haydovchisiz harakatlanadigan avtomobillarni tatbiq etishni yanada tezlashtirishga qaratilgan qonun loyihasini ma’qulladi. Bu haqda Meduza xabar bermoqda.
Bunda gap haydovchisiz boshqariladigan avtomobillar texnologiyasini tatbiq etishni federal darajada qo‘llab-quvvatlovchi ilk hujjat haqida bormoqda.
Kongress tomonidan bir ovozdan ma’qullangan qonun loyihasi shtatlar ma’muriyatiga o‘z hududida haydovchisiz harakatlanadigan avtomobillarni taqiqlashni taqiqlaydi.
Mazkur hujjat Harakat xavfsizligi bo‘yicha milliy boshqarmaga har yili 25 mingtagacha haydovchisiz harakatlanadigan avtomobilga sinov tariqasida harakatlanish uchun ruxsatnoma berishga ruxsat beradi. Keyinchalik mazkur kvotani yiliga 100 mingtagacha ko‘paytirish rejalashtirilgan.
Vakillar palatasi tomonidan ma’qullangan qonun loyihasi Senatga yuborilgan. Hujjatning AQSh Kongressi yuqori palatasidagi muhokamasi, taxminlarga ko‘ra, sentabr oyi o‘rtalarida boshlanadi.
AQShning amaldagi qonunchiligi haydovchisiz avtomobillar harakatini federal darajada tartibga solmaydi. Hozirgi vaqtda har bir shtat bu masalada o‘z qoidalarini o‘zi belgilamoqda.
Avtomobil ishlab chiqaruvchi korxonalar Harakat xavfsizligi bo‘yicha milliy boshqarmadan haydovchisiz mashinalarni sinovdan o‘tkazish uchun ruxsat olishi kerak, chunki bunday mashinalar amaldagi standartlarga mos kelmaydi. Hozirgi vaqtda yiliga faqat 2,5 mingta mashina bunday ruxsatnoma olishi mumkin.
Haydovchisiz avtomobillarni yaratish loyihalari ustida bir vaqtning o‘zida bir necha yirik kompaniyalar, xususan, Tesla, Uber Technologies va Alphabet ish olib bormoqda.
Izoh (0)