«Ижтимоий фикр» маркази томонидан 2017 йилнинг 5—14 июль кунлари «Фуқаролар Ўзбекистон Республикаси Президенти тўғрисида» мавзусида жамоатчилик фикри экспресс-сўрови ўтказилди. Бу ҳақда «Дарё»га марказ мутасаддилари маълум қилди.
Сўровдан кўзланган мақсад Президент Шавкат Мирзиёевнинг фаолияти тўғрисида мамлакат фуқаролари фикри ва Ўзбекистонликларнинг давлат раҳбарига бўлган ишончи рейтингини аниқлаш бўлди.Экспресс-сўров натижалари қуйидаги хулосаларга келишга имкон берди:
Ўзбекистонликларнинг кўпчилиги — 89,7 фоизи Президент Шавкат Мирзиёев раҳбарлигида амалга оширилаётган давлат сиёсатининг асосий йўналишларини ҳар томонлама қўллаб-қувватлайди. Давлат раҳбарининг мамлакатни модернизациялаш, давлат ва жамият ҳаётини жадал ривожлантириш учун шарт-шароитлар яратиш, ҳаётнинг барча соҳаларини либераллаштириш, аҳолининг турмуш даражаси ва сифати, фуқароларнинг фаровонлигини оширишга қаратилган ижтимоий-иқтисодий ислоҳотларни амалда рўёбга чиқариш бўйича ташаббуслари ва чора-тадбирларини юксак баҳолайди.
Сўровнинг кўплаб қатнашчилари — 83,5 фоизи давлат раҳбари ўтказаётган сиёсат аҳолининг орзу-умидларига мос келади, деган фикрни билдирди. Ўзбекистонликлар Президент томонидан мамлакат иқтисодиёти, ижтимоий соҳа, тиббиёт, ахборот-коммуникатив технологиялар, саноатни модернизациялаш ва инвестицияларни жалб қилиш, суд-ҳуқуқ тизими, фермерлик ва тадбиркорликни ривожлантириш бўйича кўрилаётган чора-тадбирлардан тўла даражада қониқади.
Жамоатчилик фикри экспресс-сўрови ўзбекистонликларнинг Шавкат Мирзиёевнинг Президент лавозимидаги фаолияти мамлакатни янада ижтимоий-иқтисодий ривожлантириш, тинчлик ва барқарорликни мустаҳкамлаш, Ўзбекистоннинг халқаро майдондаги нуфузини ўстириш, халқ фаровонлигини оширишга ёрдам беришига бўлган қатъий ишончини аниқлаб берди. Тадқиқот мамлакат фуқароларининг юқори оптимизми ва давлатнинг келажагига юксак ишончини қайд этди.
Аксарият кўпчилик (иштирокчиларнинг 89,2 фоизи) фикрига кўра, фуқаролар билан фаол ва очиқ мулоқот олиб бориш, халқ қабулхоналари шаклида жисмоний ва юридик шахсларнинг мурожаатлари билан ишлаш бўйича янги тизимнинг жорий қилиниши ижтимоий адолатни таъминлайди ва аҳоли ҳаётининг барча соҳаларидаги муаммоларни ҳал қилишнинг самарали механизми бўлиб ҳисобланади. Вазирликлар ва идоралар, турли даражадаги ҳокимият органларининг фаолиятига нисбатан аҳоли кенг табақалари, ҳар бир фуқаронинг ишончини оширади.
Жамоатчилик фикрини ўрганиш Шавкат Мирзиёевнинг аҳоли ўртасида ўсиб бораётган обрўси ва нуфузини тасдиқлади. Сўров жараёнида фуқароларнинг мутлақ кўпчилиги — 92,4 фоизи Президент халқ ўртасида юксак обрў-эътибор ва ишончга сазоворлиги, ўзбекистонликлар томонидан қўллаб-қувватланишга муносиб мамлакат етакчиси эканлигини билдирди.
Изоҳ (0)