Britaniyalik xasta bolakay Charli Gardning ota-onasi uni hayot ta’minoti tizimidan uzishga rozi bo‘ldi

London yuqori sudida er-xotin Kris Gard va Konni Yeyts farzandlari, og‘ir xastalikka mubtalo bo‘lgan Charli Gardni davolash uchun AQShga yo‘llash yuzasidan olib borilayotgan sudda ishtirok etishdan bosh tortdi. Bu haqda Meduza xabar bermoqda.

Ularning bayonotiga ko‘ra, juftlik bolaga yordam berib bo‘lmasligi haqida bir qarorga kelgan. Yaqinda o‘tkazilgan tekshiruvlar 11 oylik Charlining miyasida jiddiy nuqsonlarni aniqlaganidan so‘ng ular shu qarorga keldi.

Sud kamida ikki kun davom etishi, sud barcha tomonlarni eshitishi kutilayotgan edi. Britaniyadagi shifoxona vakillari bolaning ahvolini imkonsiz deb topgan, amerikalik shifokor esa tajribaviy davolash taklif qilayotgan edi. Er-xotin Gard va Yeyts suddan voz kechganidan so‘ng shifokorlar bolakayni hayot ta’minoti tizimidan o‘chirish huquqiga ega bo‘ladi.

Ilgari bolaning AQSh kelishi imkoni tug‘ilishi uchun Kongress unga AQSh fuqaroligini bergan edi.