Shavkat Mirziyoyev Toshkent viloyatining asosiy turistik yo‘nalishlari bilan tanishdi. Davlat rahbariga mazkur imkoniyatlardan unumli foydalanish bo‘yicha rejalar, 2017—2018-yillarda viloyatda turizm sohasini yanada rivojlantirishning asosiy ko‘rsatkich prognoz parametrlari taqdim qilindi. Bu haqda O‘zA xabar berdi.
Viloyatda Chimyon oromgohi, Chorvoq suv ombori, Ixnoj, Urungach, Shovur, Bodak ko‘llari bor. Viloyatda 45 ta mehmonxona bo‘lib, o‘tgan yili 100 mingdan ziyod sayyoh tashrif buyurgan. 4 ta turoperator, 4 ta tabiiy ko‘l, 71 ta sanatoriy, bitta qo‘riqxona, 5 ta o‘rmon xo‘jaligi mavjud.
Chimyon oromgohida xorijiy va mahalliy sayyohlar uchun 500 o‘rinli zamonaviy mehmonxona majmuasi loyihasining taqdimoti bo‘lib o‘tdi. Mazkur hududda zamonaviy osma yo‘l qurish loyihasiga ham e’tibor qaratildi. Uzunligi ikki kilometr bo‘lgan, 26 kabinadan iborat osma yo‘lni 10 oyda qurish mo‘ljallanmoqda.
Prezident Bo‘stonliq tumani, “Xo‘jakent” mahalla fuqarolar yig‘ini hududida quriladigan “Qo‘sh-Chinor” mehmonxona majmuasi loyihasini ko‘zdan kechirdi. Majmuadan 130 o‘rinli mehmonxona, 60 o‘rinli restoran, sog‘lomlashtirish markazi va xizmat ko‘rsatish shoxobchalari o‘rin olgan.
Izoh (0)