Шавкат Мирзиёев Тошкент вилоятининг асосий туристик йўналишлари билан танишди. Давлат раҳбарига мазкур имкониятлардан унумли фойдаланиш бўйича режалар, 2017—2018 йилларда вилоятда туризм соҳасини янада ривожлантиришнинг асосий кўрсаткич прогноз параметрлари тақдим қилинди. Бу ҳақда ЎзА хабар берди.
Вилоятда Чимён оромгоҳи, Чорвоқ сув омбори, Ихнож, Урунгач, Шовур, Бодак кўллари бор. Вилоятда 45 та меҳмонхона бўлиб, ўтган йили 100 мингдан зиёд сайёҳ ташриф буюрган. 4 та туроператор, 4 та табиий кўл, 71 та санаторий, битта қўриқхона, 5 та ўрмон хўжалиги мавжуд.
Чимён оромгоҳида хорижий ва маҳаллий сайёҳлар учун 500 ўринли замонавий меҳмонхона мажмуаси лойиҳасининг тақдимоти бўлиб ўтди. Мазкур ҳудудда замонавий осма йўл қуриш лойиҳасига ҳам эътибор қаратилди. Узунлиги икки километр бўлган, 26 кабинадан иборат осма йўлни 10 ойда қуриш мўлжалланмоқда.
Президент Бўстонлиқ тумани, «Хўжакент» маҳалла фуқаролар йиғини ҳудудида қуриладиган «Қўш-Чинор» меҳмонхона мажмуаси лойиҳасини кўздан кечирди. Мажмуадан 130 ўринли меҳмонхона, 60 ўринли ресторан, соғломлаштириш маркази ва хизмат кўрсатиш шохобчалари ўрин олган.
Изоҳ (0)