Shavkat Mirziyoyev Angren shahriga tashrif buyurdi

O‘zbekiston Respublikasi Prezidenti Shavkat Mirziyoyev 21-iyul kuni Angren shahriga tashrif buyurdi, deb xabar berdi O‘zA.

Birinchi Prezident Islom Karimovning 2012-yil 13-apreldagi farmoniga muvofiq tashkil etilgan “Angren” maxsus industrial zonasi yuqori texnologiyali yangi ishlab chiqarish quvvatlarini tashkil etishda muhim omil bo‘ldi. O‘zbekiston Respublikasi Prezidenti Shavkat Mirziyoyevning 2016-yil 26-oktabrdagi farmoniga muvofiq ushbu hudud “Angren” erkin iqtisodiy zonasi, deb ataldi, imkoniyatlari va imtiyozlari kengaytirildi.

Shavkat Mirziyoyev 2016-yil 20-sentabr kuni Angren shahriga tashrif buyurib, ushbu zonada amalga oshirilayotgan bunyodkorlik ishlari, yirik investitsiya loyihalari bilan tanishgan edi.

Ulardan biri konveyyer lentalari, qishloq xo‘jaligi texnikasi va avtomobil shinalari ishlab chiqarish loyihasidir. Loyihaga ko‘ra yiliga 100 ming pogon metr konveyyer lentasi, 200 mingta qishloq xo‘jaligi texnikasi shinasi, 3 million dona avtomobil shinasi ishlab chiqarish rejalashtirilgan.

Prezident mazkur loyiha ijrosining borishi bilan tanishdi.

Bu zavod mamlakatimiz iqtisodiyoti uchun juda muhim ahamiyatga ega. Bu yerda jahon standartlariga mos, yuqori sifat va keng nomenklaturadagi mahsulotlar ishlab chiqariladi. Odamlar barqaror daromad manbaiga ega bo‘ladi, hayotdan rozi bo‘lib yashaydi.

Shavkat Mirziyoyev, O‘zbekiston Prezidenti

Shavkat Mirziyoyev korxona uchun mutaxassislarni aniq, manzilli asosda tayyorlash, xomashyoni mahalliylashtirish bo‘yicha ko‘rsatmalar berdi. Xitoyning “Poli teknoloji” kompaniyasi bilan hamkorlikni kengaytirish, xususan, yangi imkoniyatlarni kashf etish, ishlab chiqarish va qayta ishlashni chuqurlashtirish bo‘yicha “O‘zkimyosanoat” aksiyadorlik kompaniyasi bilan 10-yillik strategiya ishlab chiqish zarurligini ta’kidladi.

Rejaga ko‘ra, joriy yilning 1-sentabr kuni korxonada birinchi shina ishlab chiqariladi.