Amazon 1997-yilda birinchi marta IPO’ga chiqqan vaqtdan buyon kompaniya aksiyalari 66 700 foizga qimmatlashdi, uning asoschisi Jeff Bezos esa milliarderga aylandi — Forbes versiyasi bo‘yicha dunyoning eng boy odamlari reytingida 2017-yilda u 72,8 milliard dollar bilan uchinchi o‘rinni egalladi. Forbes boshqa milliarderlarning internet-gigantning muvaffaqiyati haqidagi fikrlarini keltirib o‘tdi.
Berkshire Hathaway asoschisi Uorren Baffet (Forbes global ro‘yxatida ikkinchi o‘rinda, boyligi — 73,4 milliard dollar) yaqinda Amazon’ni sotib olish imkoniyatini qo‘ldan chiqarganini aytdi. Nima uchun o‘z vaqtida kompaniyaga sarmoya kiritmagani haqidagi savolga milliarder: “Ahmoqlik”, — deya javob berdi.
Biznesmenning so‘zlariga ko‘ra, Amazon rivojlanishining ilk bosqichlaridayoq Jeff Bezos uni hayratda qoldirgan, ammo u kompaniya bunchalik darajada yiriklashib ketishini kutmagan. “U nafaqat chakana savdo dunyosini, balki IT-sanoatni ham larzaga keltirdi”, — dedi u.
Milliarder investor, Dallas Mavericks egasi Mark Kyuban (Forbes global reytingida 564-o‘rin, 3,4 milliard dollar) fikricha, Amazon — chakana savdo kompaniyasidan ko‘ra ancha kattaroq narsa. U kompaniyani “istisnoli startap” deb atadi va internet-riteylerning aksiyalari hamon yetarlicha baholanmaganini aytdi.
Biznesmenning so‘zlariga ko‘ra, kompaniyada rivojlanish uchun ulkan imkoniyatlar mavjud, ayniqsa, gap “oldini oluvchi xaridlar” haqida ketganida. “Amazon odamlar ularga nima zarurligini anglab yetgunicha, o‘sha narsani eshigingizgacha yetkazish uchun odamlarga nima kerakligini bilishni istaydi”, — dedi u.
Amazonning samaradorligi uning eng katta afzalliklaridan biri, deb hisoblaydi investor Stenli Drakenmiller (Forbes global reytingida 348-o‘rin, 4,7 milliard dollar). Uning aniqlik kiritishicha, oddiy chakana savdo tarmoqlari sarflangan har bir dollarga bir dollarlik tovar sotishga muvaffaq bo‘lsa, Amazon har bir kiritilgan dollar uchun qariyb 4 dollar oladi.
2015-yilda Drakenmiller Amazon’ga investitsiya kiritgach, unga kompaniyaning uzoq muddatli strategiyasi yoqishini aytgandi. “Men Amazon’ni yaxshi ko‘raman… Chunki u o‘z kelajagiga sarmoya kiritadi”, — deya aniqlik kiritdi u.
Izoh (0)