Уоррен Баффетнинг хатоси: миллиардерлар Amazon ҳақида қандай фикрда?

Amazon 1997 йилда биринчи марта IPO’га чиққан вақтдан буён компания акциялари 66 700 фоизга қимматлашди, унинг асосчиси Жефф Безос эса миллиардерга айланди — Forbes версияси бўйича дунёнинг энг бой одамлари рейтингида 2017 йилда у 72,8 миллиард доллар билан учинчи ўринни эгаллади. Forbes бошқа миллиардерларнинг интернет-гигантнинг муваффақияти ҳақидаги фикрларини келтириб ўтди.

Berkshire Hathaway асосчиси Уоррен Баффет (Forbes глобал рўйхатида иккинчи ўринда, бойлиги — 73,4 миллиард доллар) яқинда Amazon’ни сотиб олиш имкониятини қўлдан чиқарганини айтди. Нима учун ўз вақтида компанияга сармоя киритмагани ҳақидаги саволга миллиардер: «Аҳмоқлик», — дея жавоб берди.

Бизнесменнинг сўзларига кўра, Amazon ривожланишининг илк босқичларидаёқ Жефф Безос уни ҳайратда қолдирган, аммо у компания бунчалик даражада йириклашиб кетишини кутмаган. «У нафақат чакана савдо дунёсини, балки IT-саноатни ҳам ларзага келтирди», — деди у.

Миллиардер инвестор, Dallas Mavericks эгаси Марк Кьюбан (Forbes глобал рейтингида 564-ўрин, 3,4 миллиард доллар) фикрича, Amazon — чакана савдо компаниясидан кўра анча каттароқ нарса. У компанияни «истисноли стартап» деб атади ва интернет-ритейлернинг акциялари ҳамон етарлича баҳоланмаганини айтди.

Бизнесменнинг сўзларига кўра, компанияда ривожланиш учун улкан имкониятлар мавжуд, айниқса, гап «олдини олувчи харидлар» ҳақида кетганида. «Amazon одамлар уларга нима зарурлигини англаб етгунича, ўша нарсани эшигингизгача етказиш учун одамларга нима кераклигини билишни истайди», — деди у.

Amazonнинг самарадорлиги унинг энг катта афзалликларидан бири, деб ҳисоблайди инвестор Стэнли Дракенмиллер (Forbes глобал рейтингида 348-ўрин, 4,7 миллиард доллар). Унинг аниқлик киритишича, оддий чакана савдо тармоқлари сарфланган ҳар бир долларга бир долларлик товар сотишга муваффақ бўлса, Amazon ҳар бир киритилган доллар учун қарийб 4 доллар олади.

2015 йилда Дракeнмиллер Amazon’га инвестиция киритгач, унга компаниянинг узоқ муддатли стратегияси ёқишини айтганди. «Мен Amazon’ни яхши кўраман… Чунки у ўз келажагига сармоя киритади», — дея аниқлик киритди у.