Rejissor Mett Rivzning “Maymunlar sayyorasi: Urush” filmi kutilgan yirik tijoriy muvaffaqiyatni keltirmadi. Kartina AQSh bozoridagi ilk premyera haftasida 56,5 million dollar to‘pladi. Bu haqda “TASS” xabar bermoqda.
Bu mazkur turkumdagi avvalgi film — “Maymunlar sayyorasi: Inqilob” filmi namoyishining ilk haftasida keltirgan tushumdan (72,6 million dollar) ancha kam. Mutaxassislar AQSh bozorida kartina 60—65 million dollar ishlab topishini kutgandi.
Tashqi bozorlarda (“Maymunlar sayyorasi: Urush” 60 dan ortiq davlatda namoyish etilmoqda) film 46 million dollar yig‘di. Bu borada Buyuk Britaniya (9,5 million dollar), Rossiya (5 million dollar) va Ispaniya (3,4 million dollar) yetakchilik qilmoqda.
Shu tariqa filmning birinchi haftadagi umumiy yig‘imlari 102,5 million dollardan iborat bo‘ldi. “Maymunlar sayyorasi” turkumidagi uchinchi kartinani yaratishga 150 million dollar sarflangandi.
Izoh (0)