Yaponiyada 70 yoshli ayol Chisako Kakeyi turmush o‘rtog‘i va ikki jazmanini o‘ldirganlikda ayblanmoqda, shuningdek, yana uch nafar erini o‘ldirganlikda gumon qilinmoqda. Sud majlisida u oxirgi erini zaharlaganini tan oldi, deb yozadi Meduza.
Chisako Kakeyi 10-iyul kuni birinchi marta sud qarshisida namoyon bo‘ldi. Sud ishi boshlanishidan avval ayol barcha vakolatlarini o‘z advokatlariga berishini aytgan edi, ammo sud majlisida u oxirgi erini o‘ldirganligini darhol tan oldi. Chisako, go‘yoki, buni eri bilan moliyaviy kelishmovchiliklar tufayli amalga oshirgan. Ayol uning ovqatiga sianid sepib qo‘ygan, zaharni esa biznes bo‘yicha sobiq yetkazib beruvchisidan olgan. Ammo keyinroq Chisako sudda qotillikni tan olganini eslay olmasligini aytdi.
Yaponiyalik ayolning avvalgi aloqalari ham shu tarzda yakun topgan: u tanishuv saytlaridan yolg‘iz va boy keksa beva erkaklarni topgan, ularning ishonchiga kirib, turmushga chiqqan, so‘ng ularni zaharlagan.
Kakeyi va uning advokatlari ta’kidlashicha, ayolda qarilik tufayli aqli zaiflik yuzaga kelgan. Buni ayblovchi tomon ham e’tirof etmoqda. Ammo uning xulosasiga ko‘ra, ayol sudda qatnasha oladi. Chisako Kakeyining ishi bo‘yicha sud oktabrgacha davom etadi, o‘z hukmini esa sud shu yilning noyabrida chiqaradi.
Izoh (0)