Dubayda 1,5 mlrd dollarlik oziq-ovqat parki quriladi

Dubayda qiymati 1,5 milliard dollarga teng bo‘lgan oziq-ovqat majmuasini qurish bo‘yicha loyiha ishga tushirildi. Bu haqda UAE Inside xabar bermoqda.

Dubai Food Park nomini olgan majmua umumiy maydoni 51 million kvadrat metrga teng bo‘ladi. Dubay amiri shayx Muhammad bin Rashid al-Maktumnig fikricha, mazkur loyiha amirlikning “mintaqadagi yetakchi oziq-ovqat sanoati markazi” sifatidagi mavqeini oshiradi.

Dubay oziq-ovqat parki qulay joyda joylashgan bo‘lib, mahsulotlarni bir vaqtning o‘zida dengiz, havo va quruqlik transporti orqali olib kelish va olib ketish mumkin bo‘ladi.

Qurilish ishlari yakuniga yetganidan so‘ng, Dubai Food Park majmuasi nisbatan kattaroq loyiha — Dubai Wholesale City’ning bir qismiga aylanadi.