Aktyor, rejissor, prodyuser va sport sharhlovchisi Alisher Uzoqov ayni vaqtda “Muzlagan” nomli yangi filmni suratga olmoqda. Yangi kartina haqida ma’lumot olish maqsadida jurnalist Feruz Muhammad san’atkordan intervyu oldi.
— Film haqida qisqacha ma’lumot bersangiz.— Film nomi “Muzalagan”, komediya janrida suratga olinmoqda. Filmda bosh rollarni Bobur Yo‘ldoshev, Umid Hamdamov, Rasul Karimov va (kulib) Alisher Uzoqov — shunaqa aktyor bor — ijro etmoqda. Ssenariy uzoq vaqt davomida yozildi, shu sababli tasvirga olish ishlarini boshlash qiyin bo‘ldi. Ancha tayyorgarlikdan so‘ng, mana, s’yomkani ham boshlab yubordik.
— Tasvirga olish ishlari qancha vaqt davom etadi?— Reja bo‘yicha, syomka 20—25 kun davom etishi kerak. Filmning 90 foiz epizodlari Toshkent shahrida suratga olinadi. Bitta katta epizodimizning tasvirga olish ishlari esa Toshkent viloyatida bo‘lib o‘tadi.
— Adashmasam, film uchun alohida kasting bo‘lmadi, shundaymi?— Ha, kasting bo‘lgani yo‘q. Filmda 20 ga yaqin aktyor-aktrisalar suratga tushmoqda. Masalan, filmimda qizlarning atigi ikkita roli bor, biroq shugina ikki rolga ham aktrisa topishga juda qiynaldim. Aktyorlarning to‘liq jamoasi bilan film ekranga chiqqanidan so‘ng tanishasiz.
— Tadbirlar, “Diydor” teatr-studiyasidagi repititsiyalar va filmga rejissorlik qilish, rol ijro etish — bularning bari bir vaqtda sizni qiynab qo‘ymayaptimi?— Tasvirga olish ishlarini boshlaganim uchun teatrdan o‘zimga tanaffus e’lon qildim. Bu film uchun ko‘p harakat qilganman, shu sabab butun e’tiborimni suratga olish ishlariga qaratganman va boshqa ishlarni deyarli qilayotganim yo‘q.
— Hali ham boshqa rejissorlarning filmlarida suratga tushmayapsiz. Nega?— Ha, boshqa rejissorlarning filmlarida suratga tushayotganim yo‘q. Takliflar bo‘ldi. Ba’zilari bilan kelisha olmadik, ba’zilarining esa ssenariysi yoqmadi. Sababi shu. Afsuski, bizga avvallari taklif qilingan ssenariylar darajasidagi ishlar hozir yo‘q. Shu sababli ham avvalgidek ko‘p rol o‘ynayotganim yo‘q.
— “Muzlagan” filmi uchun siz yillar davomida kutgan, o‘zingiz rol ijro etishni orzu qilgan darajadagi ssenariy yozildimi?— Men bunday demagan bo‘lardim. Aytishim mumkin bo‘lgani — shaxsan men, ijodiy jamoamiz o‘zbek kinosida o‘z o‘rniga ega film yaratishga harakat qilyapmiz. Ijodiy guruhning har bir ijodkori o‘z ishining ustasi. Hozirda aksariyat filmlarimizni tomoshabin e’tiboriga havola qilishga yuzaki qaralmoqda, shu sabab tomoshabinning bu filmlarga e’tibori ham yuzaki. Yaxshi film olish niyatidamiz, shunga harakat qilyapmiz.
— Film uchun mablag‘ tikkan prodyuserlar bormi yoki prodyuser ham o‘zingizmi?— Prodyuser ham o‘zim.
— Lekin siz bilan ishlashga tayyor prodyuserlar ko‘p bo‘lsa kerak?— Bilmadim, bo‘lsa bordir. Ammo ular hali men bilan aloqaga chiqqani yo‘q.
— Taqdimoti bo‘lib o‘tgan so‘nggi filmlar ichida sizga ma’qul kelgan biror film bo‘ldimi?— Men bu savolga javob bermayman.
— Premyera qachonga rejalashtirilgan?— Filmning har bir soniyasini puxta ishlaganimdan keyin, ko‘nglim to‘lsa, tomoshabinlar e’tiboriga havola qilaman. Premyera taxminan avgustning oxiri — sentabr boshida bo‘lib o‘tishi mumkin.
Izoh (0)