Актёр, режиссёр, продюсер ва спорт шарҳловчиси Алишер Узоқов айни вақтда «Музлаган» номли янги фильмни суратга олмоқда. Янги картина ҳақида маълумот олиш мақсадида журналист Феруз Муҳаммад санъаткордан интервью олди.
— Фильм ҳақида қисқача маълумот берсангиз.— Фильм номи «Музалаган», комедия жанрида суратга олинмоқда. Фильмда бош ролларни Бобур Йўлдошев, Умид Ҳамдамов, Расул Каримов ва (кулиб) Алишер Узоқов — шунақа актёр бор — ижро этмоқда. Сценарий узоқ вақт давомида ёзилди, шу сабабли тасвирга олиш ишларини бошлаш қийин бўлди. Анча тайёргарликдан сўнг, мана, с’ёмкани ҳам бошлаб юбордик.
— Тасвирга олиш ишлари қанча вақт давом этади?— Режа бўйича, съёмка 20—25 кун давом этиши керак. Фильмнинг 90 фоиз эпизодлари Тошкент шаҳрида суратга олинади. Битта катта эпизодимизнинг тасвирга олиш ишлари эса Тошкент вилоятида бўлиб ўтади.
— Адашмасам, фильм учун алоҳида кастинг бўлмади, шундайми?— Ҳа, кастинг бўлгани йўқ. Фильмда 20 га яқин актёр-актрисалар суратга тушмоқда. Масалан, фильмимда қизларнинг атиги иккита роли бор, бироқ шугина икки ролга ҳам актриса топишга жуда қийналдим. Актёрларнинг тўлиқ жамоаси билан фильм экранга чиққанидан сўнг танишасиз.
— Тадбирлар, «Дийдор» театр-студиясидаги репитициялар ва фильмга режиссёрлик қилиш, рол ижро этиш — буларнинг бари бир вақтда сизни қийнаб қўймаяптими?— Тасвирга олиш ишларини бошлаганим учун театрдан ўзимга танаффус эълон қилдим. Бу фильм учун кўп ҳаракат қилганман, шу сабаб бутун эътиборимни суратга олиш ишларига қаратганман ва бошқа ишларни деярли қилаётганим йўқ.
— Ҳали ҳам бошқа режиссёрларнинг фильмларида суратга тушмаяпсиз. Нега?— Ҳа, бошқа режиссёрларнинг фильмларида суратга тушаётганим йўқ. Таклифлар бўлди. Баъзилари билан келиша олмадик, баъзиларининг эса сценарийси ёқмади. Сабаби шу. Афсуски, бизга авваллари таклиф қилинган сценарийлар даражасидаги ишлар ҳозир йўқ. Шу сабабли ҳам аввалгидек кўп рол ўйнаётганим йўқ.
— «Музлаган» фильми учун сиз йиллар давомида кутган, ўзингиз рол ижро этишни орзу қилган даражадаги сценарий ёзилдими?— Мен бундай демаган бўлардим. Айтишим мумкин бўлгани — шахсан мен, ижодий жамоамиз ўзбек киносида ўз ўрнига эга фильм яратишга ҳаракат қиляпмиз. Ижодий гуруҳнинг ҳар бир ижодкори ўз ишининг устаси. Ҳозирда аксарият фильмларимизни томошабин эътиборига ҳавола қилишга юзаки қаралмоқда, шу сабаб томошабиннинг бу фильмларга эътибори ҳам юзаки. Яхши фильм олиш ниятидамиз, шунга ҳаракат қиляпмиз.
— Фильм учун маблағ тиккан продюсерлар борми ёки продюсер ҳам ўзингизми?— Продюсер ҳам ўзим.
— Лекин сиз билан ишлашга тайёр продюсерлар кўп бўлса керак?— Билмадим, бўлса бордир. Аммо улар ҳали мен билан алоқага чиққани йўқ.
— Тақдимоти бўлиб ўтган сўнгги фильмлар ичида сизга маъқул келган бирор фильм бўлдими?— Мен бу саволга жавоб бермайман.
— Премьера қачонга режалаштирилган?— Фильмнинг ҳар бир сониясини пухта ишлаганимдан кейин, кўнглим тўлса, томошабинлар эътиборига ҳавола қиламан. Премьера тахминан августнинг охири — сентябрь бошида бўлиб ўтиши мумкин.
Изоҳ (0)